Աշխարհը գտնվում է էներգետիկ աշխարհաքաղաքականության շրջափուլային ժամանակաշրջանում. CNN

Անկախ փորձագետների կողմից համաշխարհային էներգետիկ ոլորտին վերաբերող 2011–ի տարեկան զեկույցում «գազի ոսկե դարաշրջանին» անցնելու մասին տեսլականի մասին անդրադարձը հարցական տոնով է հիշատակվում։ Թեև մեկ տարի անց՝ Միջազգային էներգետիկ գործակալությունը՝ 2012–ի զեկույցում առանց հարցական նշանի է անդրադառնում «Գազի ոսկե դարի ոսկե կանոններին» և գազի ոսկե դարաշրջանի մեկնարկային կետը հենց ԱՄՆ–ն է, հաղորդում է CNN–ը։

Ինչպես նշվում է CNN–ում հրապարակված Ֆարիդ Զաքարիայի հեղինակած հոդվածում, «ավելի ակնհայտ է դառնում հերձաքարային գազի հեղափոխական դարաշրջանի հաստատումը և դրա ազդեցության տարածումը ոչ միայն էներգետիկ ոլորտում, այլև ԱՄՆ–ի և ողջ աշխարհաքաղաքականության վրա»։

Հերձաքարային գազի ստացման տեխնոլոգիան, որը ստացվում է ջրի, ավազի և քիմիկատների խառնուրդից, ընդամենը 20 տարի է, որ այն գործնականում կիրառվում է։

Այդ նոր տեխնոլոգիայի հաջողությունը հանգեցրել է նրան, որ ԱՄՆ–ում գազի 20 հազար հորատանցք է բացվել, ավելի քան հարյուր հազարավոր աշխատատեղ է ստեղծվել։ Միջազգային էներգետիկ գործակալությունն իր տարեկան զեկույցում նշում է, որ հերձաքարային գազի արտադրությունը մինչև 2035 թվականը 50%–ով կավելանա։ Այդ ցուցանիշի 2/3–ը կազմելու է ոչ ավանդական աղբյուրներով ստացված գազի արտադրությունը՝ մասնավորապես հերձաքարային գազը, որը ԱՄՆ–ի շուկայում միանշանակ գերիշխող դիրք զբաղեցնելու պոտենցիալ ունի։

Այդպիսով, ինչպես նշում է հոդվածագիրը, ԱՄՆ–ը կդառնա աշխարհում գազի ամենաէժան մատակարարը։ Այդ թվում նաև ամերիկյան խոշոր ավտոարտադրության գիգանտ General Motors ընկերությունը պատրաստվում է խթանել այլընտրանքային վառելիքով՝ մասնավորապես բնական գազով աշխատող մեքենաների արտադրությունը։

Ըստ Ֆարիդ Զաքարիայի, բացի տնտեսական առավելությունից, հերձաքարային գազի լայն կիրառումը աշխարհի էներգետիկ ոլորտում հեղափոխություն կատարելու լուրջ պոտենցիալ ունի և կարող է մրցակցության լուրջ հայտ ներկայացնել գազի համաշխարհային խոշոր արտահանողներ՝ Ռուսաստանին, Իրանին և Վենեսուելային։

Ըստ կանխատեսումների, առաջիկա 20 տարվա մեջ համաշխարհային էներգիայի մեծ մասը կարտադրի ԱՄՆ–ը, Ավստրալիան, Կանադան, Լեհաստանը, Ֆրանսիան և Իսրայելը։ Միևնույն ժամանակ հերձաքարային գազի արտադրության հարուստ պաշարներ ունի նաև Չինաստանը։

Թեև, ինչպես նշված է հոդվածում, գազի այդ նոր տեսակի արտադրությունը հզոր և լայնածավալ լոբբինգի կարիք ունի։