Գերմանական ոստիկանությունը լայնածավալ գործողություններ է սկսել Anonymous–ի դեմ. Spiegel

Գերմանիայի ոստիկանությունը լայնածավալ գործողություններ է սկսել Anonymous հաքերական խմբի անդամների դեմ, հաղորդում է Spiegel–ը։ 

Իրավապահները խուզարկություն են անցկացրել GEMA գերմանական ընկերության կայքի վրա հաքերական հարձակման մեջ մասնակցություն ունեցած կասկածյալների բնակարաններում։ Իրավապահներն առգրավել են բոլոր կասկածյալների համակարգիչներն ու բջջային հեռախոսները։ 

Գերմանիայի շրջանային դատախազ Ալեքսանդր Բադլեն հայտարարել է, որ 106 մարդու նկատմամբ այդ գործով մեղադրանք է առաջադրվել, որոնց մեծ մասն անչափահասներ են։

Ըստ Spiegel պարբերականի, ձերբակալված անչափահասների ծնողների համար անսպասելի է եղել իրավապահների գործողությունները, որն էլ լուրջ առիթ է դարձել ծնողների համար՝ բացատրական աշխատանք տանելու ուղղությամբ։ 

2011-ի դեկտեմբերին GEMA ընկերության կայքի վրա հաքերական հարձակման կազմակերպիչներից մեկը թաքնվել է AnonLulz օգտատերի կեղծանվան տակ։ Նա ֆորումներից մեկում հաղորդագրություն է տարածել, որի օգնությամբ հնարավոր է եղել միաժամանակ կազմակերպության կայքին մեծ թվով հարցումներ ուղարկել, որի շնորհիվ ապահովել է մուտքը՝ ընկերության տվյալների բազա։ Մեղադրյալների ցանկում են հայտնվել նաև AnonLulz–ի տարածած հաղորդագրությանը հետևած բոլոր օգտատերերը։ Սակայն, ի վերջո DDoS հարձակումը ձախողվել է, կայքի աշխատանքը չի խափանվել, թեև որոշ թերացումներ զգացնել են տվել իրենց։   

GEMA ընկերության կայքի վրա հաքերային հարձակում գործելու փաստով քրեական գործ է հարուցվել։ Գերմանիայում նման հանցագործությունների մեջ մեղադրվողներին սպառնում է ազատազրկում կամ մեծ չափի վարչական տուգանք։ Նշենք նաև, որ Anonymous–ի անդամներն իրավաբանական օգնություն են առաջարկել այդ գործով ձերբակալված կասկածյալներին։