Կկվի նման՝ ձագերին եք զոհաբերում, երկիրն եք զոհաբերում

Ինչպես արդեն տեղեկացրել ենք, այսօր Ազգային ժողովում մեկնարկել են ԱԺ «Ելք» խմբակցության նախաձեռնած խորհրդարանական լսումները՝ «2008 թվականի մարտի 1-2-ի իրադարձությունների վերաբերյալ» ԱԺ հայտարարության նախագծի շուրջ: 

Նշենք, որ  Ազգային ժողովի պետաիրավական հանձնաժողովն արդեն բացասական եզրակացություն էր տվել 2008 թվականի մարտի 1-2-ի իրադարձությունների վերաբերյալ Ազգային ժողովի հայտարարությունն ընդունելու՝ «Ելք»-ի առաջարկին: 

ԱԺ Ամբիոնին մոտեցավ 2008 թվականի մարտի 1-ի ոճրագործության զոհերից մեկի՝ Գոռ Քլոյանի հայրը և հայտարարեց, որ այսքան տարի անց չի բացահայտվել ոճրագործությունն ու մինչ օրս չեն քննվել ոստիկաններ և քննիչներ։

«Վերջերս Գևորգ Կոստանյանն ասում էր, վկաների կեսն արտագաղթել են, կեսն էլ՝ չեն հիշում մարտի մեկի ոճրագործությունը։ Պարո՛ն Կոստանյան, եթե անցնի մի քանի տարի, երևի դուք էլ չեք հիշի: Պետք է բացահայտել՝ ո՞վ հրաման տվեց և ովքե՞ր սպանեցին մեր երեխեքին»,-ասաց Քլոյանը՝ պնդելով որ այս 10 տարիների ընթացքում պատկան մարմինները «պարտակել են» կատարված հանցագործությունը։ 

Իրավապաշտպան Արթուր Սաքունցի խոսքով՝ Մարտի 1-ի համար մեկ պատասխանատուն այսօրվա իշխանությունն է․ «Ո՞ւմ չի հայտնի նրանց հրամանը, կամ արտակագ դրության մասին նրանց հայտարարությունը: Զանգվածային անկարգություններ տեղի չեն ունեցել և դատախազությունը շարունակում է համառորեն կրկնել այդ եզրույթը։ Տեղի է ունեցել քաղաքական ընդդիմության և ՀՀ քաղաքացու նկատմամբ բռնության կիրառում»,-ասաց Սաքունցը՝ նշելով, որ պետք է պատասխանատվության ենթարկել Ռոբերտ Քոչարյանին, Սեյրան Օհանյանին և 2008 թվականին պաշտոնավարած  մի շարք այլ  պաշտոնյաների։

Խոսելով պաշտոնյաների կողմից այսքան տարի անց չտրվող իրավական գնահատականի բացակայության մասին՝ Սաքունցը նշեց, որ կատարվածը պետական ահաբեկչություն էր և չկա քաղաքական կամք դրա վերաբերյալ պաշտոնական իրավական դիրքորոշում հայտնելու համար։ 

«Սերժ Սարգսյանն ուղղակի պատասխանատվություն է կրում այս հանցագործությանն իրավական գնահատական չտալու համար»,-ասաց Սաքունցը՝ աճպարարություն որակելով իրավական գնահատականը քաղաքականով փոխարինելու՝ իշխանությունների փորձերը։

«Ոչ մի երաշխիք չկա, որ այս նույն Ազգային ժողովում, ցանկացած պատգամավորի նկատմամբ քրեական գործ չի հարուցվի։ Դուք գոնե ձեզ պաշտպանեք։ Կկվի նման՝ ձագերին եք զոհաբերում, երկիրն եք զոհաբերում»։