Լոքյանը գերագնահատում է իր ազդեցության գործոնը

Վերլուծական 23 Փետրվար, 2018 17:30

Տարածքային կառավարման և զարգացման նախարար Դավիթ Լոքյանն այսօր ասուլիսով ամփոփեց 2017թ.-ի գործունեությունն ու խոսեց 2018թ. ծրագրերի մասին: Ըստ Լոքյանի՝ օպտիմալացմամբ ՀՀ կառավարությունը բարձրացնում է կառավարման արդյունավետությունը համայնքներում և ծախսերը դարձնում առավել նպատակային: Ներկայացրեց նաև այն դրամաշնորհային ծրագրերը, որոնք իրականացվել են հանրապետությունում: Դրանք տարաբնույթ են եղել և ընդհանուր առմամբ կազմել են 30-35 մլն դոլար: Դեռևս նախկին կառավարությունը սկսեց օպտիմալացումն, իսկ հետո նշանակված վարչապետ Կարեն Կարապետյանն էլ հայտարարեց, որ գոտիները ձգելու ժամանակն է: Իրականում հայտնի չէ, թե կառավարությունը որքա՞ն գումար տնտեսեց, և որտե՞ղ ուղղվեցին տնտեսած գումարները: Նախորդ տարվա ընթացքում 700 հաստիք կրճատվել է, բայց ակնհայտ է, որ դա կառավարության ապարատի պաhպանման ծախսերը չի կրճատել: Արդյունավետ կառավարման մասին էլ կարող ենք խոսել միայն ու միայն վերապահումներով:

Ոչ պակաս ուշագրավ է նաև նախարարության՝ դրամաշնորհային ծրագրերի, և ընդհանրապես տարաբնույթ ծրագրերի իրականացման նպատակով ծախսված գումարների ճակատագիրը: Նախորդ շաբաթվա վերջին Դավիթ Լոքյանը Սերժ Սարգսյանին զեկուցել է տրված հանձնարարականների կատարման ուղղությամբ իրականացված աշխատանքների մասին: Դրանից հետո տարածվեց տեղեկատվություն, որի համաձայն՝ մարզերում հրատապ խնդիրների լուծման նպատակով հատկացվել է 5 մլրդ դրամ՝ շուրջ 285 ծրագրերի իրականացման համար, որի շրջանակներում խնայվել է 1,465 մլրդ դրամ։ Այսինքն՝ այդ 285 ծրագիրը իրականացվել է ավելի էժան, քան նախատեսված է եղել, ու այդ գումարն էլ խնայվե՞լ է, թե՞ այդ ծրագրերը ուղղակի չեն իրականացվել, և որի արդյունքում էլ առաջացել է խնայողությունը: Այս մասին հաղորդագրությունում ոչինչ չի նշվում, բայց ամեն դեպքում հետարքրքիր է՝ այս թվերը լսելուց հետո Սերժ Սարգսյանը Դավիթ Լոքյանին չի՞ հարցրել՝ այդ խնայված 1,5 մլրդ դրամը ի՞նչ եք արել: Որպես կանոն, խնայված գումարները վերադարձվում են բյուջե, քանի որ կառավարության կողմից հատկացված գումարները խիստ հասցեական և նպատակային են տրվում: Սակայն բյուջե վերադարձի մասին էլ խոսք չկա: Բայց այդ մասին Լոքյանը նախընտրում է լռել:

Լոքյանը ամփոփիչ ասուլիսում անդրադարձ կատարեց նաև մարտի 11-ին շուրջ 20 համայնքներում սպասվող ընտրություններին, որոնց մի մասում ավագանու ընտրություն է, մի մասում՝ համայնքի ղեկավարի: Լոքյանը հայտարարեց, որ թեև ՀՅԴ–ական թեկնածուներ նույնպես լինելու են պայքարի մեջ, բայց «նախարարությունում սկզբունք են որդեգրել, որ նախարարությունը մասնակցում է ընտրությունների նախապատրաստական աշխատանքներին, բայց բուն ընտրություններին չի մասնակցում»: Նախարար Լոքյանին հարկավոր է հուշել, որ այդ սկզբունքը ոչ թե իր բարի կամքի և քաղաքացիական բարձր գիտակցության դրսևորումն է, այլ ՀՀ սահմանադրությամբ և մի շարք օրենսդրական ակտերով ամրագրված իրավական պահանջ: Ինչ վերաբերում է Լոքյանի այն պատասխանին, թե բոլոր ազդեցություններն, ի վերջո, գործոն են դառնում, հարկ է հիշեցնել, որ նախորդ ՏԻՄ ընտրություններում ՀՅԴ-ական թեկնածուները, որպես կանոն, պարտություն են կրել՝ պարտվելով ՀՀԿ-ին, հետևաբար, այստեղից էլ եզրակացություն՝ Լոքյանը գերագնահատում է իր ազդեցության գործոնը…

Ստելլա Խաչատրյան