Հանրապետարանները մի մարդու նման կողմ քվեարկեցին ԵԼՔ-ի նախագծին

Ազգային ժողովի փետրվարի 27-ի նիստերի օրակարգում ընդգրկելու համար ԱԺ ԵԼՔ խմբակցությունը ներկայացրել է Մարտի 1-ի գործով հայտարարության նախագիծ:

ԱԺ ՀՀԿ-ական պատգամավոր Ռուստամ Մախմուդյանն իր ելույթում նշեց, որ ԱԺ պետաիրավական հանձնաժողովում այս հարցը քննարկվել է և որոշվել է այս նախագիծն օրակարգ մտցնելու որոշմանը դեմ քվեարկել:

Մախմուդյանին հակադարձեց  իր ՀՀԿ-ական գործընկեր, պատգամավոր Գևորգ Կոստանյանը՝ նշելով, որ ԵԼՔ-ի ներկայացրած նախագիծն իր մեջ պարունակում է դետալներ, որոնք արժե քննարկել, ուստի կարելի է ԵԼՔ-ի նախագիծն ընդգրկել նիստերի օրակարգ: 

Կոստանյանի առաջարկը շտապեց պաշտպանել ԱԺ ՀՀԿ խմբակցության ղեկավար Վահրամ Բաղդասարյանը՝ առաջարկելով կողմ քվեարակել այս որոշմանը;

Բաղդասարյանի այս հորդորից հետո հարցը դրվեց քվեարկության և 93 կողմ ձայնով մտավ նիստերի օրակարգ:

6-րդ գումարման Ազգային ժողովի պատմության մեջ առաջին անգամ ԱԺ Հանրապետական խմբակցությունը միաձայն կողմ քվեարկեց ընդդիմության նախագծին: 

Թե ինչ է թաքնված Հանրապետականի այս քայլի հետևում և արդյո՞ք սրանով ընդդիմություն-իշխանություն հարաբերությունները թևակոխում են նոր փուլ՝ պարզ կդառնա ավելի ուշ;