Ջրանցքներում աղբ թափողները կպատժվեն

Վարչապետ Կարեն Կարապետյանը կառավարության նիստում անդրադարձավ ոռոգման ջրանցքները մաքրելու խնդրին և նշեց, որ յուրաքանչյուր տարի, գարնան ոռոգման ջրամատակարարման նախապատրաստական աշխատանքների շրջանակում, Ջրային տնտեսության պետական կոմիտեն իրականացնում է ջրանցքների մաքրման և ընթացիկ նորոգման աշխատանքներ: «Իրականացված ուսումնասիրությունների համաձայն՝ նման աշխատանքների զգալի մասն ուղղվում է ջրանցքներ թափված կենցաղային և այլ բնույթի աղբի մաքրմանը, որը ձևավորվում է ոռոգման, ինչպես նաև ոչ ոռոգման ժամանակահատվածում՝ հարակից բնակավայրերից։ Ստեղծվածը խոչընդոտում է ջրամատակարարման աշխատանքների կատարմանը և առաջացնում լրացուցիչ ծախսեր»,- ասաց Կարեն Կարապետյանը:

Ելնելով վերոնշյալից՝ վարչապետը Տարածքային կառավարման և զարգացման նախարարին, Ոստիկանության պետին, մարզպետներին հանձնարարեց և Երևանի քաղաքապետին առաջարկեց ձեռնարկել համալիր միջոցառումներ՝ ֆիզիկական և իրավաբանական անձանց կողմից ոռոգման ջրանցքներում աղբ թափելու դեպքերը կանխարգելելու նպատակով՝ անհրաժեշտության դեպքում ներգրավելով ոստիկանության համապատասխան ստորաբաժանումները։

Տարածքային կառավարման և զարգացման նախարարին, Ջրային տնտեսության պետական կոմիտեի նախագահին հանձնարարվեց մեկամսյա ժամկետում Ազգային ժողով ներկայացված վարչական իրավախախտումների վերաբերյալ օրենսգրքում փոփոխությունների կատարման օրենսդրական փաթեթում, սահմանված կարգով՝ ներկայացնել լրամշակումներ ոռոգման ջրանցքներում աղբ թափելու, աղտոտելու պատասխանատվության միջոցները խստացնելու վերաբերյալ: