ՀՀ ԱԻՆ-ը Պոլիտեխնիկական համալսարանում անցկացրեց ցուցադրական ուսումնավարժություն

 Հայաստանի ազգային պոլիտեխնիկական համալսարանում  ՀՀ ԱԻ նախարարությունը Քաղպաշտպանության համաշխարհային օրվա առթիվ մարտի 1-ին անցկացրեց  ցուցադրական հատուկ տակտիկական ուսումնավարժություն: Ուսումնավարժության ընթացքում գործարկվեց ազդարարման շչակը և ուսումնական նպատակներով հնչեցվեց տագնապի ազդանշան:

ՀՀ ԱԻՆ Երևան քաղաքի փրկարարական վարչության  օպերատիվ պլանավորման և բնակչության պաշտպանության բաժնի պետ, փոխգնդապետ Գագիկ Հարությունյանը նշեց, որ «Քաղաքացիական պաշտպանության միջոցառումների կազմակերպումը և իրականացումը հակառակորդի հարձակման դեպքում» թեմայով միջոցառման նպատակն է ուսումնասիրել Պոլիտեխնիկական համալսարանի  պատրաստվածության մակարդակը քաղպաշտպանության ոլորտում և բարձրացնել փոխգործակցությունը փրկարարական ծառայության և այլ ստորաբաժանումների միջև:

« Ըստ ուսումնավարժության սցենարի` Երևանում տեղի էր ունեցել   հակառակորդի կողմից հարձակում, այդ թվում` Պոլիտեխնիկական համալսարանի վրա: Եղել են հրդեհի, փլուզման  և հնարավոր քիմիական օջախներ: Առաջինը դեպքի վայրին մոտեցան  հակաքիմիական ծառայության աշխատակիցները, չեզոքացրեցին քիմիական հնարավոր օջախները, որից հետո հրշեջ փրկարարները և շտապօգնության աշխատակիցները անհրաժեշտ օգնություն ցուցաբերեցին վիրավորներին: Ըստ պլանի` դրանից հետո պարզվել էր, որ առկա է չպայթած ռումբ, որը վնասազերծվել էր մեր նախարարության քաղպաշտպանության վարչության սակրավորական ստորաբաժանման կողմից և տեղափոխվել անվտանգ վայր»,- «Արմենպրես»-ի փոխանցմամբ՝ ասաց նա:

Նրա խոսքով`ուսումնավարժանքում ներգրավված էին 100 ուսանող,ինչպես նաև միջոցառմանը մասնակցել են էլեկտրացանցերի, շտապօգնության և այլ ծառայությունները:

Մարտի 1-ին նշվում է Քաղաքացիական պաշտպանության համաշխարհային օրը:

Քաղպաշտպանության համաշխարհային օրվա առթիվ ՀՀ ԱԻ նախարարությունը ՀՀ մարզերում և մայրաքաղաք Երևանում իրականացրել են բազմաթիվ միջոցառումներ: