Իվանիշվիլիի և Սաակաշվիլիի շահերը ներկայացնող լոբբիստական խմբերի պատերազմը Վաշինգտոնում. Le Figaro

Վրաստանի առաջիկա նախագահական ընտրություններին ընդդիմության կողմից նախագահի թեկնածու առաջադրվելու հայտ ներկայացրած վրացի միլիարդատեր Բիձինա Իվանիշվիլին ԱՄՆ–ում մի քանի լոբբիստական ընկերություններ է վարձել, որոնք զբաղվում են իր հիմնական մրցակից՝ Միխեիլ Սաակաշվիլիի դիրքերը ԱՄՆ–ում թուլացնելու գործունեությամբ, գրում է Le Figaro–ն։

Լրագրող Լորա Մանդեվիլի «Վրացական լոբբիի պատերազմը Վաշինգտոնում» հոդվածում նշված է, որ նախընտրական քարոզարշավն ընթանում է ոչ միայն Թբիլիսիում, այլև Վաշինգտոնում։ Իվանիշվիլին լոբբիստների մի ամբողջ բանակ է վարձել, որոնց մոտ 1 միլիոն դոլար է վճարել ԱՄՆ–ի հեղինակավոր պարբերականներում Սաակաշվիլիի դեմ հակաքարոզչություն ծավալելու, ԱՄՆ–ի արտաքին քաղաքականության վրա մեծ ազդեցություն ունեցող գիտահետազոտական կենտրոններում հանդիպումներ կազմակերպելու նպատակով։

Ըստ փորձագետների, այդ գործողությունների հիմնական նպատակը ԱՄՆ–ի իշխանությանը համոզելն է, որ «իրենց վրացի դաշնակիցը (Սաակաշվիլին - Ծ.Թ.) չի համարվում ժողովրդավարության խորհրդանիշ»։

Թերթը նշում է, որ Սաակաշվիլին երկար տարիներ ազդեցիկ լոբբիստական կառույցներ ստեղծել, որոնց հիմնական նպատակը Վրաստանի ժողովրդավարական դեմքը ԱՄՆ–ում պատշաճ ներկայացնելն է։

Այդ առիթով Իվանիշվիլին New York Times–ին տված հարցազրույցում լրագրողի հարցին հարցով է պատասխանել՝ նշելով, որ «իսկ ինչու՞ ես չեմ կարող մի քանի լոբբիստական խմբեր վարձել Վրաստանի իրական պատկերը ԱՄՆ–ում ներկայացնելու համար»։  

Թերթը նշում է, որ Podesta և Orion Strategies լոբբիստական ընկերությունները ամսական համապատասխանաբար 50 և 45 հազար դոլար են ստանում Վրաստանի կառավարության շահերը ԱՄՆ–ում ներկայացնելու համար։ Հոդվածի հեղինակը նշում է, որ Վրաստանի իշխանությունը ընդդիմադիր միլիարդատերին համարում է «Ռուսաստանի մարդը»։ 

Այդ առիթով, ինչպես նշում է հեղինակավոր պարբերականը, ԱՄՆ–ում Վրաստանի դեսպան Թեմուր Յակոբաշվիլին ասել է՝ «կարող եմ բազմաթիվ փաստեր ներկայացնել, որ ըննդիմության կողմից Վրաստանի իշխանություններին ուղղված մեղադրանքները նույն մեղադրանքներն են, որոնք ռուսական լոբբին կիրառում է Վրաստանի իշխանության դեմ»։ 

Բարաք Օբաման շարունակում է աջակցել պաշտոնական Թբիլիսիին, թեև Սպիտակ տունը ցանկանում է, որպեսզի իշխող ռեժիմը գործի ժողովրդավարացման ճանապարհով, մասնավորապես՝ շրջաններում։ Սակայն Վրաստանի իշխանությունն, իր հերթին նախազգուշացնում է, որ նման միամիտ մոտեցման դեպքում Մոսկվան բաց չի թողնի հարմար առիթը և կխափանի Վրաստանի արևմտամետ ծրագիրը, եզրափակում է Le Figaro–ն։