Իսպանիան ԵՄ-ից ակնկալում է 100 միլիարդ եվրոյի ֆինանսական օգնություն. The Financial Times

Իսպանիայի ֆինանսների նախարար Լուիս դե Գուիդոսը Իսպանիայում բանկային համակարգի վերականգնման համար եվրոգոտու երկրների իր գործընկերներից պաշտոնապես օգնություն է խնդրել, գրում է The Financial Times-ը։

«Պատիվ ունեմ Իսպանիայի կառավարության անունից ձեզ դիմելու և ֆինանսական օգնություն խնդրելու, որպեսզի կարողանանք վերականգնել Իսպանիայում ֆինանսատնտեսական ճգանաժամը և ֆինանսական կառույցների կանոնավոր գործունեությունը», – նշված է Գուիդոսի նամակում։

Լյուքսեմբուրգի վարչապետ Ժան-Կլոդ Յունկերը, որը գլխավորում է ԵՄ ֆինանսների հանձնաժողովը, պատասխան նամակում հայտնել է, որ Իսպանիայի վարկային հայտը կքննարկվի հուլիսի 9–ին:

Նամակում չի նշվել գումարի չափը, թեև Իսպանիան ակնկալում է ստանալ մինչև 100 միլիարդ եվրո։

Իսպանիայի կառավարությունն ակնկալում է, որ ԵՄ–ը ֆինանսական օգնությունը բանկերին կտրամադրի պետական հաստատությունների միջոցով, թեև եվրագոտու երկրների մեծ մասը դեմ են Իսպանիայի կառավարության այդ առաջարկին։ Եվրամիությունը ցանկանում է այդ գումարը տրամադրել անմիջապես բանկերին՝ առանց Իսպանիայի կառավարության միջամտության։

Ինչպես գրում է պարբերականը, վարկի հետաձգման պատճառը հենց այդ հանգամանքն է եղել։

Նշենք, որ գործընթացին հետևում են Եվրոպական կենտրոնական բանկի հանձնաժողովը, Արժույթի միջազգային հիմնադրամը, ինչպես նաև Իսպանիայի օրենսդիր հաստատությունները։

Եթե վարկը տրամադրվի, Իսպանիան Իռալանդիայի, Հունաստանի և Պորտուգալիայի հետ միասին կլինի չորրորդ երկիրը, որը խոշոր ֆինանսական օգնություն է ստանում Եվրամիությունից։