ԱՄՆ հատուկ ծառայությունները գտել են տեղեկատվական արտահոսքերը կանխարգելելու միջոցը. THE HILL

«ԱՄՆ Կենտրոնական հետախուզական վարչությունը, Հետաքննությունների դաշնային բյուրոն և ԱՄՆ կառավարության համապատասխան գործակալությունների աշխատակիցները ստի դետեկտորի միջոցով համապատասխան տեստ կանցնեն առ այն, թե արդյոք նրանք տեղեկություններ չեն հայտնել լրագրողներին»,- գրում է The Hill պարբերականը։

Ինչպես գրում է The New York Times–ը, այդպիսի հարցեր հատուկ ծառայությունների աշխատակիցներին տրվելու են ոչ միայն տեստի ընթացքում, այլ անհրաժեշտություն առաջանալու դեպքում ցանկացած պահի։ Գաղտնի տեղեկություններ հրապարակելու դեմ պայքարի շրջանակներում ԱՄՆ կառավարությունը ձեռնարկում է նաև այլ միջոցառումներ։ Մասնավորապես, ինչպես նշում է The Wall Street Journal–ը,  ԱՄՆ հատուկ ծառայությունների ղեկավարները հանձնարարել են վերանայել գաղտնի գործակալների և լրագրողների հարաբերությունները կարգավորող կանոնները՝ դրանք խստացնելու նպատակով։   

Ինչպես գրում է The Hill–ը, տեղեկատվական արտահոսքի դեմ պայքարում ԱՄՆ նախագահ Բարաք Օբամայի վարչակազմը ավելի ակտիվ միջոցառումներ սկսեց ձեռնարկել այն բանից հետո, երբ այս գարնանը ամերիկյան մամուլում հրապարակումներ եղան հատուկ ծառայությունների իրականացրած գաղտնի գործողությունների վերաբերյալ։ Լրագրողներն այդ հրապարակումներում հղում էին տվել այդ գործողությունների մանրամասներին քաջատեղյակ աղբյուրներին։ Այդ հրապարակումներում մասնավորապես հիշատակվում է, որ Օբաման անձամբ էր ընտրում ահաբեկիչների ցանկը, որոնք պետք է հարձակման ենթարկվեին անօդաչու թռչող սարքերի կողմից։ Մեկ այլ հրապարակման մեջ հիշատակվում է, որ 2009–ին Օբաման, նախագահ դառնալուց ամիսներ անց, անձամբ է ակտիվացրել և կոորդինացրել Իրանի միջուկային ծրագրի դեմ կիբեռհարձակումները։ Բացի այդ ամերիկյան մամուլում տեղեկություն էր հրապարակվել «Ալ–Կաիդայի» կողմից օդանավի գրավելու և ահաբեկչություն իրականացնելու ծրագիրը կանխելու վերաբերյալ։ 

ԿՀՎ–ն, ՀԴԲ–ն և ԱՄՆ արդարադատության նախարարությունը քննություն են սկսել վերոնշյալ գործով և նման տեղեկատվական արտահոսքերի կապակցությամբ։ Մի քանի հանրապետական գործիչներ՝ մասնավորապես սենատոր Ջոն Մակքեյնը, մեղադրում են Օբամայի վարչակազմին՝ լրագրողներին կանխամտածված գաղտնի տեղեկություններ տրամադրելու մեջ։

Պարբերականը գրում է, որ Սպիտակ տան ղեկավարի վարչակազմը միտումնավոր է նման քայլի գնացել՝ նախագահական ընտրություններից ամիսներ առաջ իրենց թեկնածուի շուրջ ազդեցիկ քաղաքական գործչի կերպարը բարձրացնելու նպատակով։