Ո՞վ է մոխրագույն կոստյումով տղան. Բելառուսի հաջորդ դիկտատորը. The Independent

Այս շաբաթ Վենեսուելա կատարած պաշտոնական այցի ընթացքում Բելառուսի նախագահ Ալեքսանդր Լուկաշենկոն մեկ անգամ ևս ակնարկել է, որ մտադիր է, ի վերջո, իշխանությունը հանձնել արտաամուսնական կապի արդյունքում ծնված որդուն՝ Նիկոլային. «Այստեղ է գտնվում իմ որդի Նիկոլայը և դա նշանակում է, որ մենք լուրջ և երկարաժամկետ համագործակցության հիմքերի վրա ենք դնում երկու երկրների միջև հարաբերությունները, և մեզնից հետո կա մեկը, որ պետք է ստանձնի իշխանությունը 20-25 տարի հետո», – գրում է Independent–ը՝ մեջբերելով Բելառուսի նախագահի հայտարարությունը, որն արվել էր Վենեսուելայի նախագահ Ուգո Չավեսի հետ կայացած հանդիպման ընթացքում։ 

Ինչպես նկատել է հոդվածագիրը՝ մինչ երկու երկրների նախագահները զրուցում էին, «թագաժառանգ» Նիկոլայը մոխրագույն կոստյումով, շիկահեոր մազերը գեղեցիկ հարդարված, ուղիղ կանգնել էր երկու նախագահների մեջտեղում, թեև ելույթ ունենալու Չավեսի առաջարկին «ոսկե տղան» կտրուկ մերժել է։

Բելառուսի նախագահի կրտսեր որդին, ով ընդամենը 7 տարեկան է, պաշտոնական արարողակարգային միջոցառումներին մասնակցելու հարուստ փորձ ունի։ Նա արդեն մի քանի անգամ մասնակցել է ռազմական շքերթների, մասնակցել է կառավարության անդամների, ինչպես նաև մի շարք երկրների նախագահների հետ հանդիպումներին։

«Նույնիսկ բանակի գեներալները հարկադրված պատիվ են տվել Նիկոլային», – նշել է հոդվածագիր Շոն Ուոքերը։ 

Հանգստյան օրերին Լուկաշենկոն մեկնելու է Կիև՝ «Եվրո–2012»-ի եզրափակիչ խաղը դիտելու։ Եվրոպական երկրների նախագահները, բացի Լեհաստանի նախագահից («Եվրո–2012» ֆուտբոլի առաջնությունը ներկայացնող երկրներից մեկը), ի նշան Յուլյա Տիմոշենկոյի բանտարկության դեմ բողոքի, մերժել են եզրափակիչ խաղին ներկա գտնվելու Ուկրաինայի հրավերը։ Ինչպես նշել է հոդվածագիրը՝ կիրակի օրը կայանալիք եզրափակիչ խաղին, եթե Լուկաշենկոն հրավիրված նախագահներից VIP սրահում միակ ներկա գտնվող նախագահը լինի, ապա այդ պատկերը անհարմարություն կստեղծի Ուկրաինայի նախագահ Վիկտոր Յանուկովիչի համար։