Ես նույնիսկ զրկված եմ մոմ վառելու իրավունքից. Կարեն Անդրեասյան

««Հարսնաքարի» դեպքի վերաբերյալ չեմ արել հայտարարություն մի պարզ պատճառով, որովհետև հայտարարություններ ՄԻՊ-ն անում է այն ժամանակ, երբ վիճելի է խնդիրը»,- այս մասին լրագորղների հետ հանդիպմանը ասաց Մարդու իրավունքների պաշտպան Կարեն Անդրեասյանը: Նրա խոսքերով՝ այս դեպքում խնդիրն այնքան միանշանակ է, որ հայտարարությունը կլիներ սոսկ ստանդարտ ինչ-որ նախադասությունների շարան, որը չէր կարող որևէ ազդեցություն ունենալ: «Ես խուսափեցի անել նման հայտարարություն, բայց հիմա բնականաբար դատապարտում եմ, բնականաբար այնքան ցավալի է, որ այլ բառեր ավելացնելը կդառնար ուղղակի անտրամաբանական այս խնդրի համար»,- նշեց նա:

«Միևնույն ժամանակ հասարակությունը, եթե ուրիշներից սպասում է սոսկ դատապարտման խոսքեր կամ հայտարարություններ, ՄԻՊ-ից սպասում է գործողություններ, օգնություն, պաշտպանություն: Ես ցավով պետք է հայտնեմ, որ և՛ այս, և՛ մնացած բոլոր քրեական դեպքերում ՄԻՊ-ը որևէ իրավասություն չունի միջամտելու, և սա այն բացառիկ դեպքերից է նաև, որ ես ցավով եմ ֆիքսում, որովհետև եթե մեր դատաիրավական համակարգը գործեր այնպես, ինչպես պետք է գործի՝ ըստ օրենքի, մարդիկ նույնիսկ չէին էլ փորձի ՄԻՊ-ի մոտ տեսնել այս խնդրի լուծումը: Բոլոր երկրներում էլ օմբուդսմեններին արգելվում է միջամտել ընթացիկ դատական, քրեական գործերին»,- հավելեց Անդրեասյանը: Վերջինս ասաց նաև, որ ինքը նախանձում է այն քաղաքական ուժերին, քաղաքացիներին, քաղաքացիական կազմակերպություններին, որոնք կարող են արտահայտել իրենց մարդկային կարծիքները: «Ես կարող էի ժամեր շարունակ ասել, թե ես՝ որպես մարդ, ինչ եմ զգում, որքանով եմ վրդովված, որքանով է այս ամենն ինձ համար թվում այլանդակություն և անընդունելի մի իրավիճակ: Միևնույն ժամանակ որպես ՄԻՊ՝ ես չեմ կարող գնահատական տալ և սա ընդամենը Կարեն Անդրեասյանի վրդովմունքն է, որը միանում է բոլորիդ վրդովմունքին: Ես զրկված եմ նույնիսկ իրավունքից՝ որպես մարդ գնալ և մեկ մոմ վառել ինչ-որ ակցիայի ժամանակ: Ես պետք է լինեմ հավասարակշռված, որովհետև նրանք, ովքեր այս պահին ձերբակալված են, նույնպես պետք է կարողանան դիմել ՄԻՊ-ի ինստիտուտին, և ես պետք է կարողանամ պահպանել այդ չեզոքությունը՝ իմ գործը ըստ օրենքի կատարելու համար», - ասաց օմբուդսմենը:

Ամփոփելով իր խոսքը՝ Կարեն Անդրեասյանը նշեց, որ իր համար սա վախերի, շատ տարբեր տեսակի վախերի արդյունք ու հետևանք է: «Հարսնաքարի դեպքը մի ծանր նժար է այն բոլոր վախերի վրա, որտեղ մենք բոլորս միասին վախենում ենք տարբեր, հզոր մկաններ ունեցող մարդկացից և այդ վախն անհաղթահարելի է՝ մինչև չլինի դատաիրավական նորմալ բարեփոխումներ»: