Անչափահասների անգործությունը հանգեցնում է իրավախախտումների

Յուրաքանչյուր դեպք, որը կատարվում է անչափահասի նկատմամբ, անչափահասի կողմից՝ դա լինի իրավախախտում, կամ որևիցե այլ հանցագործություն, ոստիկանության ղեկավարության կողմից անմիջապես վերցվում է հսկողության տակ։ Այս մասին այսօր լրագրողների հետ հանդիպման ժամանակ տեղեկացրեց ՀՀ Ոստիկանության քրեական հետախուզության գլխավոր վարչության 3-րդ վարչության պետի տեղակալ, անչափահասների գործերով բաժնի պետ, ոստիկանության գնդապետ Նելլի Դուրյանը։

Ավելի մեծ ուշադրություն է դարձվում հատկապես ամառվա ամիսներին, քանի որ խնդիր է առաջանում՝ անչափահասների զբաղվածության հետ կապված։ Այս իսկ պատճառով, դեռևս մայիս ամսին, ոստիկանության պետի առաջին տեղակալի ստորագրությամբ համապատասխան հանձնարարական իջավ ոստիկանության բաժիններին, որպեսզի աշխատակիցներն ուշադրության կենտրոնում պահեն հասարակական վայրերում անչափահասների վարքագիծի խախտումները հնարավորինս կանխելու համար։

Հունիս ամսվա ընթացքում անչափահասների կողմից կատարվող մարմնական վնասվածքների 17 ամփոփագիր է տրվել, որից 16-ը կատարվել է հասարակական վայրերում։ Նրանց մոտից հայտնաբերվել է 6 սառը կտրող գործիք։ Այս խնդրին լուծում տալու համար Նելլի Դուրյանը կոչ է անում ծնողներին հնարավորինս աչալուրջ լինել և հետևել երեխաների վարքագծին, ուշադիր լինել, թե ինչ են տանից դուրս հանում։

Նելլի Դուրյանը ևս մեկ անգամ կրկնեց հեռուստաեթերը մաքրելու կարևորության մասին, անգամ նշեց, որ իրավախախտումները հաճախ սերիալների, ֆիլմերի կրկնօրինակումն են լինում։

Հաշվառված երեխաների զբաղվածության հարցը լուծելու համար Գյումրիում ոստիկանությունը համագործակցել է կրթության վարչության հետ, և 19 անչաափահասների ուղղորդել են Հանքավան ճամբար, World Vision հասարակական կազմակերպության հետ համատեղ 37 անչափահաս ուղղորդվել է Աղվերանի ճամբար, «Նոր սերունդ» ՀԿ-ի հետ 8 հաշվառված անչափահաս ուղղորդվել է Հանքավան։

Շատ դեպքերում երեխաները հակահասարակական արարքներ են թույլ տալիս ներընտանեկան խնդիրների պատճառով, այն դեպքում, երբ ծնող- երեխա հարաբերությունները ճիշտ հարթության մեջ չեն գտնվում։ Երեխաների վարքագիծը փոխելու համար ոստիկանությունը հարկ եղած դեպքում աշխատում է ծնողների հետ, անհրաժեշտության դեպքում բացասական ներգործություն ունեցող ծնողները ևս հաշվառման տակ են վերցվում, իսկ վերականգնողական համայնքային կենտրոններում նրանց հետ աշխատանք են տանում հոգեբանները, մանկավարժները։