Միթ Ռոմնին կմեկնի Իսրայել Նեթանյահուի հետ հանդիպելու. The New York Times

Մասաչուսեթսի նախկին նահանգապետ Միթ Ռոմնին, ով ներկայացնելով ԱՄՆ–ի Հանրապետական կուսակցությունը՝ պայքարում է ԱՄՆ–ի նախագահի պաշտոնի համար, առաջիկայում կմեկնի Իսրայել վարչապետ Բենյամին Նեթանյահուի հետ հանդիպելու, գրում է The New York Times–ը։

Նեթանյահուի գլխավոր խորհրդական Ռոն Դերմերը Ռոմնիին անվանել է Իսրայելի բարեկամը, ում հետ նրանք ուրախ են հանդիպել։ Ռոմնին նաև հանդիպում կունենա Իսրայելի նախագահ Շիմոն Պերեսի և իսրայելցի այլ քաղաքական գործիչների հետ։ Ռոմնիի նախընտրական շտաբը ծրագրել է իրենց թեկնածուի հանդիպումը Պաղեստինի ինքնավարության վարչապետ Սալամ Ֆայադի հետ, թեև այցի հստակ ժամկետները մինչ այժմ չեն հաղորդվում։

Ինչպես նշել է New York Times–ը, Ռոմնիի այցը Իսրայել պայմանավորված է ԱՄն–ում բնակվող հրեաների աջակցությունը ստանալու ակնկալիքով. խոսքը վերաբերում է ինչպես նրանց ձայներին, այնպես էլ Ռոմնիի նախընտրական հիմնադրամին դրամական նվիրատվություններ կատարելուն։ 2008–ի նախագահական ընտրություններին ԱՄՆ–ի հրեաների մեծ մասը քվեարկել էր Բարաք Օբամայի օգտին, ով մտադիր է երկորդ անգամ վերընտրվել ԱՄՆ նախագահի պաշտոնում։ Թերթը հիշատակում է, որ 2008–ի նախընտրական կամպանիայի ընթացքում Օբաման նույնպես այցելել էր Իսրայել, հանդիպել էր իսրայելցի քաղաքական գործիչների հետ, այդ թվում Նեթանյահուի հետ, ով այդ ժամանակ Իսրայելի ընդդիմության առաջնորդն էր։ Ինչպես նշել է հոդվածագիրը, Ռոմնիի այցն Իսրայել նաև ցուցադրական բնույթ ունի, քանի նա այդպիսով ցանկանում է ամրացնել ԱՄՆ–ի և Իսրայելի հարաբերությունները՝ ակնկալելով ԱՄՆ–ի քրիստոնեա–ավետարանչականների աջակցությունը ԱՄՆ–ի նախագահական ընտրություններում, ովքեր ավանդաբար համակրանք ունեն Իսրայելի նկատմամբ։

Ավելի վաղ Ռոմնին Օբամային մեղադրել էր պաղեստինյան խնդրի շուրջ բանակցություններում Իսրայելի կառուցողական դիրքորոշումը խաթարելու մեջ։

Սա արդեն Ռոմնիի չորրորդ այցն է Իսրայել։ 2011–ի հունվարին նա հանդիպել էր Նեթանյահուի հետ։ Ինչպես նշված է Politico ամսագրի հրապարակման մեջ, նրանք ընկերական հարաբերություններ են պահպանում դեռևս 1970-ական թվականներից, երբ միասին աշխատել են Boston Consulting Group ընկերությունում։

ԱՄՆ–ի նախագահական ընտրությունները տեղի են ունենալու նոյեմբերի 6–ին։ Ռոմնին ԱՄՆ–ի նախագահական ընտրությունների հանրապետական թեկնածու կընտրվի օգոստոսին կայանալիք Հանրապետական կուսակցության համաժողովի ընթացքում։