Ազգային համաձայնության կառավարությունը՝ փլուզման եզրին

Մայիսին, ԱԺ-ն, հաստատելով ՀՀ վարչապետ Նիկոլ Փաշինյանի կառավարության ծրագիրը, համաձայնեց մեկ տարվա ընթացքում ԱԺ արտահերթ ընտրություններ անցկացնելու դրույթին: Սակայն այսօր այդ ընտրությունների անցկացումը մեծապես վտանգված է: Պատճառն էլ այն է, որ Երևանի ավագանու ընտրությունների քարոզչական թոհուբոհում Փաշինյանի կառավարության անդամ ուժերի միջև կրքերը լարված են, նրանք միմյանց հասցեին մեղադրանքներ ու սպառնալիքներ են հնչեցնում: Եվ սխալված չենք լինի, եթե ասենք, որ համաձայնության կառավարությունը կանգնած է փլուզման եզրին, իսկ Նիկոլ Փաշինյանն էլ՝ իր դաշնակիցներին կորցնելու ճանապարհին: Արդեն իսկ արտահերթ ընտրություններ անցկացնելու հարցում խորհրդարանում առկա ուժերից ՀՀԿ-ն, ԲՀԿ-ն և «Ելք»-ում ներկայացված մի քանի պատգամավորներ դեմ են արտահայտվում արտահերթ ընտրություններ անցկացնելուն` ասելով, թե կարող են դեմ քվեարկել այդ կապակցությամբ ներկայացվելիք նախագծերին: Օրինակ՝ ԱԺ «Ելք» խմբակցության պատգամավոր Արամ Սարգսյանն անդրադարձավ վարչապետ Նիկոլ Փաշինյանի հայտարարություններին եւ վերջինիս պարզապես հիշեցրեց, թե վերջինս ում օգնությամբ է ընտրվել, ինչպես են իրեն պաշտպանել ելույթներով ու գործողություններով ու բաց տեքստով հասկացրեց` այլեւս մտածելու են՝ քվեարկե՞լ Աժ արտահերթ ընտրությունների համար, թե՞ ոչ։ Ազգային ժողովի «Ծառուկյան» խմբակցության պատգամավոր, ԲՀԿ քաղաքապետի թեկնածու Նաիրա Զոհրաբյանը երեկ եւս հայտարարել է, թե միանշանակ կիսում է Արամ Սարգսյանի հնչեցրած մտահոգությունները:  Եվ եթե հաշվի առնենք, որ վերջին շրջանում առանձնապես շատ հարթ չեն ՀՅԴ-ՔՊ հարաբերությունները, եւ ՀՅԴ-ական պատգամավորները եւս ասում էին, թե ամեն ինչ պետք է Սահմանադրությանը համապատասխան արվի, իրավական դաշտում, ոչ թե ճնշմամբ, ապա չի բացառվում, որ իրենք եւս դեմ կգնան սահմանադրական փոփոխություններ անցկացնելու նախագծին: 

Ընդ որում, այս հռետորաբանությունը փոխադարձ է՝ Երևանի ավագանու ընտրությունների շրջանակներում անցկացվող գրեթե յուրաքանչյուր հանրահավաք, որին մասնակցում է վարչապետ Փաշինյանը, վեր է ածվում, այսպես կոչված, դաշնակիցներին ուղղված սպառնալիքների: Վերջինս առիթը բաց չի թողնում խորհրդարանական ուժերին հիշեցնել, որ քուչեքում հակահեղափոխականների հետ հանդիպումներն իր ուշադրությունից չի վրիպում:

Այսինքն՝ Փաշինյանը եթե նախաձեռնի սահմանադրական փոփոխություններ (դրանում նախատեսելով ԱԺ ինքնալուծարման համար դրույթներ), միգուցե չկարողանա ԱԺ-ում այն անցկացնել: Մյուս կողմից՝ ԱԺ-ն գործող Սահմանադրության դեպքում կարող է իրավունքի ուժով արձակվել, եթե վարչապետը հրաժարական ներկայացնի ու երկու անգամ նոր վարչապետ չընտրվի: Բայց այս հեռանկարն էլ վտանգավոր է, քանի որ այդ դեպքում հնարավոր է ներպալատական հեղաշրջում իրականացվի. ՀՀԿ-ն կարող է այլ թեկնածու առաջադրել և խորհրդարանական մյուս ուժերի հետ այլ վարչապետ ընտրել: Իսկ որպես վարչապետի այլընտրանքային թեկնածու այս պահին ամենահավանականը ՀՀ երկրորդ նախագահ Ռոբերտ Քոչարյանի թեկնածությունն է, հաշվի առնելով նաև այն ռեսուրսները որոնց Քոչարյանը տիրապետում է, բացի այդ՝ 2-րդ նախագահը ռուսական լրատվամիջոցներին տված հարցազրույցներում հաճախ է շեշտում, որ պատրաստվում է հենվել իրեն աջակցություն հայտնած քաղաքական ուժերի վրա: Իսկ այդ ուժերը, չմոռանանք՝ ևս խորհրդարանական ուժեր են:

Ի՞նչ լծակներ են մնալու Փաշինյանին՝ եթե ազգային համաձայնության կառավարություն կազմող ուժերն ի վերջո չտրվեն սպառնալիքներին և չքվեարկեն ո՛չ սահմանադրական փոփոխությունների, ո՛չ էլ, առավել ևս, խորհրդարանական արտահերթ ընտրությունների անցկացման օգտին: Փաշինյանը կրկին փողոց է հանելու հասարակությա՞նը՝ եթե ընտրությունները կայանան գարնանը, ապա այդ դեպքում հեղափոխական էյֆորիան հարաբերականորեն իր տեղը զիջած կլինի ռացիոնալ մտածողությանը՝ թելադրված գազի գնի հնարավոր թանկացմամբ, Հայաստանի շուրջ ստեղծված աշխարհաքաղաքական իրողություններով և դրանց՝ մեր կառավարության անհամաչափ արձագանքով

Ինչևէ՝ ազգային համաձայնության կառավարություն կորչվածն արդեն իսկ փլուզման եզրին է, իսկ ընտրություններից հետո՝ եթե դրանք իհարկե կայանան, արդեն իսկ քաղաքական տրամաբանությունն է հուշում, որ ազգային համաձայնության կառավարությունը մնալու է անցյալում:

Ս.Խաչատրյան