Խոշոր ծրագրեր է իրականացնելու. Գարեգին Բ-ն չի հեռանա

Մամուլում շրջանառվում են լուրեր, թե Ամենայն Հայոց Կաթողիկոս Գարեգին Բ-ն ինքնակամ կհեռանա, քանի որ ներքին պայմանավորվածություն կա ներկայիս իշխանության հետ: 

Մայր Աթոռի տեղեկատվական համակարգի տնօրեն Տեր Վահրամ քահանա Մելիքյանի հերքումը չուշացավ. նա դրանք «կեղծ լուրեր» որակեց:

«Անհրաժեշտ ենք համարում փաստել, որ Երրորդ Հանրապետության 27-ամյա պատմության ընթացքում առանց բացառության բոլոր կառավարությունները Հայաստանյայց Առաքելական Սուրբ Եկեղեցու եւ մասնավորապես Վեհափառ Հայրապետների նկատմամբ դրսեւորել են պատշաճ հարգանք եւ գնահատել են Հայոց Եկեղեցու եւ Ամենայն Հայոց Կաթողիկոսի առանձնահատուկ դերը մեր պետականության զարգացման, ազգային միասնության ու համերաշխության պահպանման գործում»,- հայտարարեց տեր Վահրամ քահանա Մելիքյանը: 

Սակայն ԼՈՒՐԵՐ.com-ի աղբյուրների փոխանցմամբ՝ Գարեգին Բ-ն դեռևս 2 ամիս առաջվանից սկսել է գլոբալ բարեփոխումների գործընթացը, որում ինտեգրված են նաև Հայ Եկեղեցու Համաշխարհային Երիտասարդաց Միավորման  (ՀԵՀԵՄ) անդամները, և կարգալույծ լինելու ոչ մի նպատակ չունի, չնայած տարածվող լուրերին: Ծրագրերն իրագործման փուլում են այս պահին, և առաջիկայում դրանք արդեն տեսանելի կլինեն:  

Հիշեցնենք, որ տևական ժամանակ է` Ամենայն հայոց կաթողիկոսի  կարգալույծ արվելու պահանջով  նաև շարժում է ձևավորվել` «Նոր Հայաստան, նոր Հայրապետ» անվանումով։ Շարժման մասնակիցները պնդում են, որ ունեն հստակ փաստեր՝ կապված կաթողիկոսի «մութ» անցյալի հետ: Շարժման մասնակիցների շարքերում են նաև Հայր Կորյուն վարդապետը, Տեր Արմեն քահանայը և Տեր Կորյուն քահանան: