GALLUP. Երևանի ավագանու ընտրություններում ձայների գերակշիռ մեծամասնությունը կստանա «Իմ քայլը»

 Երևանի ավագանու ընտրություններում անցողիկ շեմը կհաղթահարեն «Իմ քալը», «Բարգավաճ Հայաստան»-ը և «Լույս»-ը. այս մասին են վկայում Gallup International Association-ի Հայաստանում լիիրավ անդամ Էմ Փի ՋԻ ընկերության անցկացրած հարցման արդյունքները:  

«Երևանի ավագանու ընտրություններում, հարցումների արդյունքներով, քաղաքացիների 60,6 տոկոսը  պատրաստվում է քվեարկել «Իմ քայլը» կուսակցությունների դաշինքի օգտին,  9.2  տոկոսը` «Բարգավաճ Հայաստան»-ի: Առաջատար եռյակում է նաև «Լույս» կուսակցությունների դաշինքը` 4.3 տոկոս ձայներով»,-լրագրողների հետ հանդիպմանն ասաց Gallup International Association-ի հայաստանյան ներկայացուցչության հետազոտական բաժնի ղեկավար Գայանե Դաջունցը:

Մանրամասնելով՝ Դաջունցը հայտնեց, որ «Ավագանու ընտրություններում որ քաղաքական ուժի օգտին եք պատրաստվում քվեարկել» հարցին հարցվածների 60.6 տոկոսը պատասխանել է, որ իր ձայնը պատրաստվում է տալ «Իմ քայլը» կուսակցությունների դաշինքի օգտին, 9.2 տոկոսը` «Բարգավաճ Հայաստան»-ին, «Լույս» դաշինքին` օգտին` 3.4 տոկոսը,  1.3  տոկոսը` «Երկիր Ծիրանի»-ին , 1.1 տոկոսը` «Ժառանգությանը» , 0.8 տոկոսը,  ՀՅԴ-ին,  0.7  տոկոսը` «Օրինաց Երկիր» կուսակցությանը:

«Երևանի հանրություն» կուսակցությունների դաշինքին պատրաստվում է ձայն տալ հարցվածների 0,7 տոկոսը, «Ռեֆորմիստների կուսակցությանը»` 0,4 , «Ժողովրդավարական ուղի» կուսակցությանը  և «Երևանցիներ» կուսակցությունների դաշինքին ` 0,4 տոկոսը և «Հայք» կուսակցությանը` 0.3 տոկոսը»,-ներկայացրեց  Դաջունցը:

Հրաժարվել է պատասխանել հարցվածների 11,6 տոկոսը, դժվարացել է պատասխանել 8.9 տոկոսը:

«Մասնագետները փորձել են նաև հրաժարվածների և պատասխանել դժվարացածների ձայները համապատասխանաբար բաշխել կուսակցությունների միջև: Արդյունքում, առանց հաշվի առնելու «դժվարանում եմ պատասխանել» և  «հրաժարվում եմ պատասխանել» տարբերակները, ստացվել է, որ 76. 3 քվեարկելու է «Իմ քայլ» կուսակցությունների դաշինքի օգտին , 11.6 տոկոսը «Բարգավաճ Հայաստան»-ի , իսկ  4.3  տոկոսը` «Լույս» կուսակցությունների դաշինքի օգտին: «Հաստատ կարող ենք ասել, որ ընտրություններում կանցնեն «Իմ քայլ» կուսակցությունների դաշինքը և «Բարգավաճ Հայաստան» կուսակցությունը, միգուցե նաև «Լույս» կուսակցությունների դաշինքը` հաշվի առնելով հետազոտության սխալի տոկոսի հավանականությունը»,-նշեց Դաջունցը:

Հարցվողների 76,4 տոկոսը տեղյակ է եղել, որ սեպտեմբերի 23- ին նախատեսվում է ավագանու արտահերթ ընտրություն: 19,1  տոկոսը դժվարացել է նշել ընտրությունների անցկացման ամսաթիվը, միայն 4.5 տոկոսը տեղյակ չի եղել, որ կայանալու են Երևանի ավագանու ընտրություններ: Դաջունցը նշեց` նախորդ հարցման արդյունքների համեմատ 42.1 տոկոս աճ է գրանցվել այն հարցվողների, ովքեր տեղեկացված են ընտրությունների անցկացման օրվա մասին:

Հնչել է նաև հարց` նշել  ավագանու ընտրություններին մասնակցող կուսակցություններին:

«Իմ քայլ» կուսակցությունների դաշինքի անունը նշել է 83. 4 տոկոսը, 70.7 տոկոսը`  «Բարգավաճ Հայաստան» կուսակցության  անունը, 28.3  տոկոսը` «Լույս դաշինք»-ի: «Օրինաց երկիր» կուսակցության անունը նշել է հարվածների 26 տոկոսը, «Երկիր Ծիրանի» կուսակցությանը`  24.8  տոկոսը, ՀՅԴ-ին` 19. 3 տոկոսը:  

Ըստ հարցումների արդյունքների` կուսակցությունների կողմից իրականացվող քարոզարշավներին հետևում է 62.4  տոկոսը: Հարցվողների 85. 5 տոկոսը տեսել, հանդիպել է «Իմ քայլը» կուսակցության քարոզարշավներին,  52.6  տոկոսը` «Բարգավաճ Հայաստան» կուսակցության քարոզարշավներին, 21.1  տոկոսը` «Երկիր Ծիրանի»-ի, 18.9  տոկոսը` «Լույս» կուսակցությունների դաշինքի, 16.3 «ժառանգության», 11.4  տոկոսը` «Օրինաց երկիր» կուսակցության քարոզարշավներին: Տոկոսները աստիճանաբար նվազել են: Հարցվողների 64.7 տոկոսը քարոզարշավներին հանդիպել է հեռուստացույցով, 24. 9 տոկոսը` «Ֆեյսբուք»-ի  էջերով , 22.5  տոկոսը` բակերում հանդիպումների շնորհիվ, 17.9 տոկոսը` «Ֆեյսբուք»-ի ուղիղ եթերներով, 8 տոկոսը բուկլետներով, արտաքին գովազդով, իսկ 2.6 տոկոսը ռադիոյով:

Ուշագրավ է նաև կուսակցությունների նախընտրական ծրագրերին ծանոթացածների թիվը: 53,8 տոկոսը նշել է, որ ծանոթացել է դաշինքների նախընտրական ծրագրերին, սակայն ոչ ամբողջությամբ, այլ պարզապես որոշակի դրույթների: «Իմ քայլը» դաշինքի նախընտրական ծրագրերին ծանոթացել է հարցվածների 88.7 տոկոսը, «Բարգավաճ Հայաստան» կուսակցության ծրագրերին` 51.3 տոկոսը, «Երկիր Ծիրանի» կուսակցության ծրագրերին` 17.8 , իսկ «Լույս» կուսակցությունների դաշինքի նախընտրական ծրագրերին` 15.9 տոկոսը: Հարցվողները ծրագրերին ծանոթացել են հիմնականում հեռուստացույցի , այնուհետև «Ֆեյսբուք»-ի էջերի միջոցով: 

Կուսակցությունների և կուսակցությունների դաշինքների կողմից իրականացվող բակային հանդիպումներին մասնակցել է 16.4 տոկոսը: Նրանց 78.4 մասնակցել է «Իմ քայլ» կուսակցությունների դաշինքի հանդիպումներին, 21.2 տոկոսը «Բարգավաճ Հայաստան» կուսակցության, իսկ  4.5 տոկոսը «Լույս»-ի հանդիպումներին:

Ընտրություններին միանշանակ մասնակցելու է հարցվածների 72.9 տոկոսը, ավելի շուտ մասնակցելու է  13.7  տոկոսը, ավելի շուտ չի մասնակցելու 3.6 տոկոսը, հաստատ չի մասնակցելու 8.7  տոկոսը, իսկ 1.1 տոկոսը դժվարացել է պատասխանել:

Հետազոտությունն անցկացվել է դեմ առ դեմ: Մասնակցել է 805 մարդ: Այն անցկացվել է սեպտեմբերի 18-20-ը  Երևանի բոլոր վարչական շրջաններում: Էմ Փի ՋԻ ՍՊԸ տնօրեն Արամ Նավասարդյանը սակայն, հիշեցրեց`  դրանք միայն կանխատեսումներ են: Հետազոտության ընտրանքային սխալը կազմել է 3.5 տոկոս: