Փաշինյանի թիմի մտավախությունը

«Մեր խնդիրն այն է, որ չպետք է թույլ տանք նոր իշխանությանը` դառնալ մենաշնորհային, ինչը որ նախկինում էր, և մենք սկսել ենք արդեն մեր պայքարը դրա դեմ՝ մասնակցելով Երևանի ավագանու ընտրություններին և ներկայացնելով մեր ծրագրերը, գաղափարներն ու մոտեցումները, քանի որ մյուս կուսակցությունները ևս պետք է ունենան հնարավորություն արտահայտվելու և խնդիրների մասին բարձրաձայնելու»։ Այս մասին ԼՈՒՐԵՐ․com-ի հետ զրույցում ասաց «Ռեֆորմիստներ» կուսակցության նախագահ Վահան Բաբայանը՝ անդրադառնալով այն դիտարկմանը, թե վարչապետ Փաշինյանի քայլերը տանում են դեպի գերկուսակցականացման։

Բաբայանի խոսքով՝ յուրաքանչյուր ուժ, որն իշխանության է եկել փողոցի ճնշման արդյունքում, պետք է ունենա իր մտավախությունները, քանի որ դեռ տեղի չի ունեցել լեգիտիմ խորհրդարանանական ընտրություններ, որպեսզի ֆիքսվի, թե քաղաքական որ ուժի օգտին է մեր հասարակությունը քվեարկում։ Ըստ Բաբայանի՝ խորհրդարանական ընտրությունները մարդկանց դուրս կհանեն ներքաղաքական այս լարված վիճակից, և դրա արդյունքում հասարակությունն ու քաղաքական ուժերը կհասկանան, թե ինչ է տեղի ունեցել ՀՀ-ում, ինչ է տեղի ունենալու, և իրականում պարզ կլինի՝ որ ուժին է մարդկանց մեծ մասն իր ձայնը տալիս։

«Իհա՛րկե, Փաշինյանի թիմը կունենա այդ մտավախությունը և արդարադատությունն ու արտահերթ ընտրությունները մեկ ուժի հետ կապելը ևս խոսում է այդ մասին, քանի որ ամեն ինչ կախված է հրապարակում հավաքված մարդկանց քանակից։ Եթե  չլինի այդ մարդկանց ճնշումը՝ Փաշինյանը մեկ օր ավել չի մնա այդ պաշտոնին։ Եթե գա մի օր, և այդ հրապարակում 100․000-ի փոխարեն հավաքվի 5000 մարդ, ապա պարոն Փաշինյանը չի ունենա լեգիտիմ հնարավորություն մնալու այդ պաշտոնին»,-ասաց Վահան Բաբայանը։

«Ռեֆորմիստներ» կուսակցության նախագահն, անդրադառնալով Փաշինյանի այն հայտարարությանը, թե պետք է տեղի ունենան սահմանադրական փոփոխություններ, ըստ որոնց՝ առանց կառավարության լուծարման ԱԺ-ն կարող է ցրվել, կարծիք հայտնեց, որ դա դեռ չի մտնի օրակարգ, քանի որ շատ լուրջ խնդիր է։

«Այսօրվա իշխանության առաջնային խնդիրը պետք է լինի ոչ թե ականջահաճո հայտարարություններ, այլ ՀՀ քաղաքացիների կյանքի բարելավմանն ուղված քայլեր անելը։ Հասարակությունն այսօր սպասում է և՛ աշխատավարձերի բարձրացմանը, և՛ աշխատատեղերի ստեղծմանը, թոշակների բարձացմանն ու երիտասարդ ընտանիքների համար բարենպաստ պայմանների ստեղծմանը, նմանատիպ այլ բաների է սպասում հասարակությունը, և նրան չի հետաքրքրում Փաշինյանի սահմանադրական փոփոխությունները։ Նման առարկայական հարցերը պետք է լինեն առաջնային և Փաշինյանի կառավարումը կավարտվի այն ժամանակ, երբ չտրվեն այդ հարցերի լուծումները»,-շեշտեց Բաբայանը, հավելելով, որ հասարակության ակտիվ զանգվածն ինչ-որ քանակությամբ մարդիկ են, որոնք պատրաստ են իրենց կարծիքը փողոցում հայտնել, ինչը  ամբողջ հասարակությունը չէ, և յուրաքանչյուր հարցի լուծումը պետք է լինի ողջ ժողովրդի արտահայտած կարծիքի արդյունք։

Վահան Բաբայանը համոզված է, որ այն կոսմետիկ փոփոխությունները, թե՝ պետավտոտեսչությունը լավ է աշխատում կամ մեկ այլ ոլորտում լավ է ամեն ինչ՝ քիչ է ժողովրդի համար։ «Երիտասարդությունն ունի՞ հնարավորություն այստեղ մնալու և աշխատելու: Ո՛չ, չունի: Նույնը չուներ նախորդ իշխանության ժամանակ, և եթե այս հարցերը մոտակա ամիսների ընթացքում ևս լուծում չստանան՝  ես վստահ եմ, որ դա մարդկանց մոտ մտածելու տեղիք է տալու, և այդ էյֆորիա ասվածը չի լինելու։ Հասարակությանը հետաքրքրում է էլեկտրաէներգիան, գազը, ջուրը, անշարժ գույքի գները, մարդիկ պետք է հասկանան, թե այդ փոփոխությունը որն է և որտեղ է երևում»,- հավելեց «Ռեֆորմիստներ» կուսակցության նախագահ Վահան Բաբայանը։

Արմինե Միքայելյան