Նախորդների ավանդույթները կշարունակվեն. ԱԳՆ հերթական «դիվանագիտական ձախողումը»
Վերլուծական
ԱԳՆ ապաշնորհությունից և ոչ նախաձեռնողական արտաքին քաղաքականությունից դժգոհ է ոչ միայն ամբողջ հանրությունը, այլ նաև իշխանությունները: Հավանաբար, հենց այս պատճառով էլ ԱԳՆ-ն սկսել է դեսպանների հետկանչի գործընթաց: Արդեն իսկ մի քանի երկրներում Հայաստանի դեսպանները վերադարձել են հայրենիք: Այս գործընթացը տրամաբանական է՝ հաշվի առնելով մեր երկրում տեղի ունեցած քաղաքական տրանսֆորմացիաները, միևնույն ժամանակ, հանրության մոտ առկա են որոշակի մտավախություններ՝ կապված նոր նշանակումների հետ. Փոխարտգործնախարար Ռուբեն Ռուբենյանը շտապել է «հանգստացնել» հասարակությանը, սակայն նրա հայտարարությունն ավելի շատ հարցեր է առաջացրել: Մասնավորապես, Ռուբենյանն ասում է՝ «Վարչապետը հստակ հայտարարել է, որ քաղաքական նշանակումներ չպետք է լինեն, մոտ ապագայում քաղաքական նշանակումները բացառում եմ, բայց երկարաժամկետ առումով չի կարելի բացառել: Ուզում եմ շեշտել, որ խոսքը ոչ թե ինչ-որ մեկի քավորի կամ սանիկի մասին է, այլ ընդհանրապես բոլոր երկրներում կա պրակտիկա, որ կարող են քաղաքական նշանակումներ լինել, այլ հարց է, որ դրանք չպետք է գերակշռեն»:
Իրականում այստեղ բոլորովին այլ հարց է: Դեսպանների փոփոխման գործընթացը, ըստ էության, միտված է դիվանագիտական կորպուսն առավել կոմպետենտ դիվանագետներով համալրելուն, սակայն փոխարտգործնախարարի խոսքերից ակնհայտ է դառնում որ նախորդների ավանդույթներից նոր իշխանությունը չի պատրաստվում հրաժարվել, պարզապես, այս անգամ խնամի-ծանոթ–բարեկամների հարաբերակցությունը լինելու է զգալիորեն փոքր, և որևէ մեկը չի կարող բացառել, որ բաղձալի պաշտոնները բաժին չեն հասնի հենց քավորներին և սանիկներին: Համաձայնեք՝ թույլ արդարացում է, այն էլ՝ Նոր Հայաստանի արտգործնախարարության համար: Ընդհանրապես, վերջին շրջանում ԱԳՆ-ն ամեն կերպ ձգտում է վերակենդանացման նշաններ ցույց տալ՝ կամ սահմանախախտ թուրք երիտասարդի համար են Երևանում էքսկուրսիա կազմակերպում, կամ քրեաօլիգարխիայի դիվանագիտական անձնագրերն են վերադարձնում, սակայն մեկ նման հայտարարությունը ջուրն է թափում ԱԳՆ ողջ «ինքնափիառը»:
Նոր իշխանությունները, որոնք ժամանակին անչափ բուռն էին արձագանքում Էդուարդ Նալբանդյանի գլխավորած կառույցի անգործությանը, ստեղծված դրությունը շտկելու համար պետք է դիմեն արմատական փոփոխությունների, ինչը բնավ չի ենթադրում Սերժ Սարգսյանի մերձավոր շրջապատի փոխարինումը՝ Փաշինյանի մերձավոր շրջապատով…
Ս.Խաչատրյան
ՈՒՂԻՂ ԵԹԵՐ
Ամենադիտված 
Իշխանությունը կասկածում է Վանաձորի քաղաքապետի պաշտոնակատար Ակային. «Հրապարակ»
