Ավինյանը թերացե՞լ է. խախտումները «ջրի երես» են դուրս եկել

Վերլուծական 28 Սեպտեմբեր, 2018 19:00

Բնապահպանության և ընդերքի տեսչական մարմնի տարածած հաղորդագրությունից տեղեկանում ենք, որ «Արմենիան Քափըր Փրոգրամ» ՓԲԸ-ում իրականացված ստուգման արդյունքներով՝ մթնոլորտային օդի և ջրերի աղտոտման, թափոնները ոչ պատշաճ պահպանելու պատճառով շրջակա միջավայրին հասցված վնասի չափը կազմել է շուրջ 380 միլիոն դրամ, որը ներկայացվել է Ընկերությանը: Ստեղծված իրավիճակից ելնելով՝ Բնապահպանության և ընդերքի տեսչական մարմինն ընկերությանն առաջարկել է Ալավերդի քաղաքում կազմակերպել հանրային քննարկում և իրականության մասին ամբողջ ճշմարտությունը ներկայացնել բնակչությանը: Հանրային քննարկման արդյունքում կներկայացվի առկա իրողությունը և ձուլարանի հետագա գործունեության հնարավոր հեռանկարները:

ՀՀ փոխվարչապետ Տիգրան Ավինյանի հուլիսի 12-ի որոշմամբ` «Արմենիան Քափըր Փրոգրամ» ՓԲԸ-ի կողմից Հայաստանում նոր պղնձաձուլարանի կառուցման ծրագրի նախապատրաստման աշխատանքներին պետական աջակցության ապահովման նպատակով ստեղծվել էր աշխատանքային խումբ: Խմբի ղեկավարը Վարագ Սիսեռյանն էր` Ավինյանի գրասենյակի ղեկավարը:

Ընդ որում ՝ Բնապահպանության և ընդերքի տեսչական մարմնի ներկայացուցիչներն այդ աշխատանքային խմբում ներառված չեն եղել, գուցե դա է պատճառը, որ այսքան օպերատիվ են աշխատել՝ ի տարբերություն Սիսեռյանի գլխավորած աշխատանքային խմբի: Միևնույն ժամանակ, բաց է մնում երկու կարևոր հարց, որոնց Ավինյանի գրասենյակը պարտավոր է պատասխանել՝ ինչո՞ւ է ընդհանրապես կառավարությունը որոշում կայացրել աջակցել «Վալլեքս» խմբին պատկանող ընկերություններից մեկին և արդյո՞ք աշխատանքային խումբ ստեղծելուց առաջ կառավարությունը կատարել էր իրավիճակի պատշաճ գնահատում: Աշխատանքային խումբ ստեղծելու որոշումն արդեն իսկ ենթադրում է, որ այն ստեղծված է արդեն աջակցություն ցուցաբերելու համար և քննարկման պիտի դրվեն աջակցության ձևերը, իսկ վերը նշված իրավիճակի գնահատումն աշխատանքային նման կազմի կարողությունների շրջանակում չէ: