ԿԸՀ-ն քննարկում է ԲՀԿ-ի հայցն՝ ընդդեմ Դանիել Իոաննիսյանի

Կենտրոնական ընտրական հանձնաժողովում այսօր՝ սեպտեմբերի 28-ին նիստ է գումարել, որի օրակարգում ընդգրկված երկու հարցերից մեկը վերաբերում է «Բարգավաճ Հայաստան» կուսակցության լիազոր ներկայացուցիչ Ռուբեն Մանուկյանի կողմից Կենտրոնական ընտրական հանձնաժողով ներկայացված դիմումի քննությանը: Հարցի քննարկման ժամանակ ԿԸՀ նախագահ Տիգրան Մուկուչյանը հայտարարեց, որ դիմումի քննության կապակցությամբ ԿԸՀ են հրավիրել դիմումատուին: Միաժամանակ, հրավիրվել է Դանիել Իոաննիսյանը, ում վերաբերում է դիմումը:

Մուկուչյանը ընթերցեց դիմումը, ըստ որի՝ սույն թվականի սեպտեմբերի 22-ին, Երևան քաղաքի ավագանու ընտրությունների քվեարկության նախորդող օրը, Մեդիա կենտրոնում «Անկախ դիտորդ» դաշինքի ներկայացուցիչները, այդ թվում՝ կառավարությանն առընթեր ընտրական հանձնաժողովի քարտուղար Դանիել Իոաննիսյանը, կազմակերպել են ասուլիս, դրա շրջանակներում ներկայացրել են դաշինքի կողմից իրականացված մեդիամոնիտորինգի տվյալները: Ասուլիսի ընթացքում Իոաննիսյանի կողմից հատուկ շեշտադրվել է, որ ստացվել են բազմաթիվ զանգեր, որ ԲՀԿ-ի կողմից ընտրակաշառք է բաժանվել և հանուն արդարության՝ պնդել, որ այդ զանգերց որևէ մեկը չի ապացուցվել: Հայտարարավել է նաև, որ նույն կուսակացության կողմից գումար է բաժանվել ֆլեշմոբի մասնակիցներին, որի համար վերջիններս առնվազն պետք է հարկվեին: Այնուհետև պնդել է, որ ԲՀԿ-ի անդամները, տեղեկանալով այդ մասին, սպառնացել են դատական հետապնդումներ իրականացնել այն անձանց նկատմամբ, ովքեր, իբր, գումար են ստացել և դրա մասին բարձրաձայնել: Դիմումում նշվում է նաև, որ ընտրության նախորդող օրը ասուլիս կազմակերպելն ու հակաքարոզչություն անելը համարվում է օրենքի կոպիտ խախտում:  

Դանիել Իոաննիսյանն էլ, իր խոսքում անդրադառնալով դիմումատուի բողոքին՝ նշեց. «Այդ հայտարարությունը հիմնված էր իմ անձնական դիտարկման վրա, և դա ապացուցող ձայնագրություն կա, որը ես քիչ անց կհրապարակեմ: Ինչ վերաբերում է լռության օրը ասուլիս կազմակերպելուն և հակաքարոզչություն իրականացնելուն, ապա հարկ եմ համարում նշել, որ ընտրական օրենսգրքում չկա լռության օր եզրույթ»,- ասաց Իոաննիսյանը:

Հիշեցնենք, որ Երևանի ավագանու ընտրություններին նախորդող օրը դաշինքը ներկայացրել էր իր կողմից քարոզարշավի ընթացքում իրականացված մեդիամոնիտորինգի արդյունքները: Սակայն ասուլիսի ընթացքում իր աջակիցների հետ «Մեդիա կենտրոն» էր ժամանել ԱԺ «Ծառուկյան» խմբակցության քարտուղար Վահե Էնֆիաջյանը, որը դժգոհել էր, թե «Անկախ դիտորդի» անդամները ԲՀԿ-ի հասցեին անհիմն մեղադրանքներ են հնչեցնում: