Պայմանավորվածությո՞ւն, թե՞ շահ...
Քաղաքական
Ինչպես արդեն հայտնի է, Դուշանբեյում զրույց է տեղի ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև, որի ժամանակ որոշակի պայմանավորվածություններ են ձեռք բերվել։
Կողմերը որոշել են մշակել համապատասխան կառույցների միջև օպերատիվ կապի հաստատման մեխանիզմներ, ինչպես նաև պայմանավորվածություն են ձեռք բերել սահմանագծում լարումը նվազեցնելու և միջադեպերը կանխելու վերաբերյալ:
«Հանդիպմանը մեծ նշանակություն տալ պետք չէ, քանի դեռ լուրջ բանակցություններ չեն ստեղծվել խնդրի կարգավորման շուրջ: Քանի որ Փաշինյանն ու Ալիևը ծանոթացման փուլում են` չեմ կարծում, թե լուրջ բանակցությունները շուտ կվերսկսվեն: Այդ ֆորմատով հանդիպումների ժամանակ լուրջ բանակցություններ չեն ընթանում, դրանք ընթանում են երկկողմ հանդիպումների ժամանակ՝ համանախագահների միջնորդությամբ: Եթե Ադրբեջանը որոշել է սրել իրավիճակը, այդ պայմանավորվածությունները ոչինչ չեն նշանակելու, իսկ եթե որոշել է չսրել իրավիճակը, դարձյալ առաջնորդվելու է իր շահերով, ոչ թե պայմանավորվածություններով»,- ԼՈՒՐԵՐ.com-ի թղթակցի հետ զրույցում նման տեսակետ հայտնեց քաղաքագետ Արմեն Բաղդասարյանը՝ հույս հայտնելով, որ այս զրույցը կհանգեցնի բանակցությունների նոր որակի:
Նրա խոսքով՝ դա աշխատանքային կարճատև երկխոսություն էր, որը դժվար թե լուրջ հետևանքներ ունենա. ոտքի վրա մի քանի նախադասություն փոխանակելուց ոչ հրադադարի ռեժիմն է ավելի ամուր դառնալու, ոչ էլ կողմերի դիրքորոշումներն են դրական դառնալու:
Քաղաքագետը նկատեց, որ Նիկոլ Փաշինյանի դիրքորոշումն ավելի կոշտ է Արցախյան հարցում, քան նախորդ իշխանություններինը. «Փաշինյանը խոսեց ցեղասպնության սպառնալիքի մասին, ինչպես նաև շեշտեց՝ բացառված է, որ Ղարաբաղը լինի Ադրբեջանի կազմում և դա հիմնավորեց ՄԱԿ-ի ամբիոնից: Եթե նախկին իշխանությունները խոսում էին փոխզիջումների մասին, ապա Փաշինյանը հայտարարեց, որ դրա մասին խոսելն անիմաստ է, քանի որ դիմացինը փոխզիջում չի ուզում»,- նշեց Բաղդասարյանը:
Սոնա Հարությունյան
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
