1984 թ. ԻՆՉՊԵՍ ԵՂԵԼ Է. Նոր Արեշում հանցագործի կրակած փամփուշտները փշրել էին տանտիրուհու ատամներն ու մնացել լեզվին «նստած»

1in.am-ը գրում է․

1984 թվականի ապրիլի 8-ին, ժամը 23-ի սահմաններում միլիցիայի Էրեբունու բաժնում ահազանգ  է հնչել, որ Աթոյան փողոցի տներից մեկի բակում մարդ են սպանել:

Դեպքի վայր գնացած իրավապահները  մատնանշված տան բակ են մտել ու տեսել ընկած երիտասարդի, որը խռխռացնում էր: Շտապօգնություն են ահազանգել, բայց երիտասարդը իրավապահների գալուց 2-3 րոպե անց մահացել է:

Իրավապահները մտել են տուն: Նրանց դեմ-հանդիման դուրս է եկել մի կին, կանգնել է նրանց առաջ, ապա թքել է ափի մեջ ու իրավապահներին է մեկնել ափը, որի մեջ… չորս ատամ կար ու հրազենի երկու գնդակ:

Պարզվել է՝ տուն ներխուժած անծանոթը կրակել է… 70-ամյա կնոջ բերանին, բայց ինքնաշեն ատրճանակի համեմատաբար լայն փողից դուրս եկած փամփուշտներն անհրաժեշտ արագություն չեն զարգացրել, դիպել են կնոջ ատամներին՝ տեղահան են արել դրանք և վերջնականապես կորցնելով արագությունը՝ մնացել են կնոջ բերանում՝ լեզվի վրա:

Հանցագործությունը բացահայտվել է մի քանի օրվա ընթացքում…

…Փառանձեմն ապագա ամուսնու՝ Անդրանիկի հետ Սիրիայից Հայաստան էր եկել 1946 թվականին: Նրանք ամուսնացել էին Երևանում, բնակություն էին հաստատել Նոր Արեշ թաղամասում:

Անդրանիկը երկար կյանք չէր ունեցել: Փառանձեմը շուտ էր այրիացել, երկու դուստրերին պահելու հոգսն ընկել էր նրա ուսերին:

Փառանձեմն աղջիկներին մեծացրել էր, բայց հասկացել էր, որ խորհրդային երկրում չի կարողանում ապրել, սկսել էր քայլեր ձեռնարկել, որ մեկնի ԱՄՆ:

Ամերիկայում ապրող բարեկամների շնորհիվ նախ կարողացել էր Ամերիկա ուղարկել ավագ դստերը, հետո՝ կրտսերին: Մնում էր, որ ինքն էլ տուն-ունեցվածք վաճառի ու մեկնի:

Կրտսեր դուստրը մինչև Ամերիկա մեկնելը սիրահարվել էր երևանաբնակ մի երիտասարդի՝ Արտակին: Մինչև մեկնելը Սոնան հասցրել էր նաև նշանվել Արտակի հետ:

1984 թվականի սկզբից Փառանձեմը Ամերիկա մեկնելու նախապատրաստական աշխատանքներ է կատարել: Եվ վերջապես հուլիսին դուստրերը անհրաժեշտ փաստաթղթերը Ամերիկայից Երևան ուղարկելով՝ մորը տեղեկացրել են,թե կարող է տունը վաճառել ու Արտակի հետ ճամփա ընկնել:

Արտակը ոգևորված օգնել է զոքանչին՝ տան վաճառքի, իրերը հավաքելու հարցերում:

Հարևան-բարեկամները գիտեին, որ Փառանձեմը Սոնայի նշանածի հետ պատրաստվում է Ամերիկա մեկնել, ավելի հաճախ էին այցելել նրան, խոսել մեկնումից, դրա հետ կապված հոգսերից:

Փառանձեմի մեկնելու մասին, բնականաբար, տեղյակ էր նաև նրա պատկից հարևանը: Վերջինս մի օր առօրյա զրույցի ժամանակ հարևանուհու՝ Ամերիկա մեկնելու, այդ պատճաով տունը և ունեցվածքը վաճառելու մասին հայտնել է հորեղբորորդուն՝ Ռուբիկին:

Նախկինում գողությունների  համար պատիժներ կրած Ռուբիկին հանգիստ չի տվել տարեց Փառանձեմի կողմից տունը վաճառելու, մոտը մեծ գումար ունենալու միտքը:

Նա ծրագիր  է մշակել՝ Փառանձեմի տուն ներխուժելու և եղած գումարներն ու արժեքավոր իրերը գողանալու համար: Պետք է երկու հարևանների տները բաժանող պարզ ցանկապատից ցատկեր, մտներ Փառանձեմի բակ: Հետագա գործողությունները կախված էին լինելու իրավիճակից: Եթե տանտիրուհին քնած լիներ, արհեստավարժ գողը պետք է սուսուփուս իր գործն աներ ու դուրս գար: Եթե տանտիրուհին արթնանար, Ռուբիկը պատրաստ էր ավելի կտրուկ քայլերի դիմելու՝ հենց տանտիրուհուց իմանալու փողերի ու զարդերի տեղը, ապա… վերացնելու նրան: Այդ տարբերակի իրականացման համար նա հետը ինքնաշեն ատրճանակ էր վերցրել…

Ռուբիկը, որ սովորաբար ավելի հաճախ էր այցելում հորեղբոր ընտանիքին, վերջին օրերին Արեշում չէր երևացել՝ աչքի չընկնելու համար:

Ապրիլի 8-ին Ռուբիկը ձեռնարկել էր հանցավոր ծրագրի իրականացումը: Մութը վաղուց վրա էր հասել: Ռուբիկն անցել էր ցանկապատի վրայով, մտել էր Փառանձեմի բակը:  Բայց անսպասելի՝ նրա առաջ հայտնվել էր Սոնայի նշանածը՝ Արտակը. նա այդ օրը գիշերելու էր զոքանչի տանը…

Ռուբիկը, անակնկալի գալով, հասկանալով, որ հետ գնալ չի կարող, ծրագրից հրաժարվել էլ չի ուզում, հանել էր հետը վերցրած ինքնաշեն ատրճանակն ու կրակել էր զարմացած Արտակի բերանին…

Արտակը տապալվել էր գետնին:

Ռուբիկը ներխուժել էր տուն, նրա դիմաց հայտնվել էր Փառանձեմը: Ռուբիկը երկու անգամ կրակել էր Փառանձեմի բերանին, մտածել էր, որ նրան էլ սպանեց ու սկսել էր փողերի փնտրտուքը: Ոչինչ չէր գտել… Ռուբիկը չգիտեր, որ տան գնորդը փողը պետք է վճարեր Փառանձեմի մեկնելու նախօրեին…

Ռուբիկը ձեռնունայն դուրս էր եկել հանցանքի վայրից ու սարսափահար փախել էր՝ երկու մարդու էր սպանել ոչնչի համար…

Մանրմասները՝ ԱՅՍՏԵՂ։