Թե ինչու «Հարսնաքարի» գործով կալանավորվածների մեղադրանքում փոփոխություն չկա

«Ընդհանրապես մեղադրանք այդքան շուտ չեն ներկայացնում: Ճիշտ է, մեղադրանք առաջադրում են, բայց էական է այն մեղադրանքը, որով գործը մտնում է դատարան»,-Լուրեր.com-ի հետ զրույցում նման տեսակետ հայտնեց նախկին դատավոր Պարգև Օհանյանը:

Անդրադառնալով լրագրողի այն հարցին, թե ինչու «Հարսնաքարի» գործով կալանավորվածների մեղադրանքում փոփոխություն չկա այն դեպքում, երբ Վահե Ավետյանը մահացել է, Օհանյանն ասաց, որ կարևոր չէ ծեծվողը մահացել է, թե ոչ, ըստ նրա՝ մեր օրենսդրությամբ դա էական չէ:

«Ես գիտեմ, որ զարգացած երկրներում էլ դա կարևոր չէ: Կարևորը վերջնական մեղադրանքն է, որով գործը մտնում է դատարան: Այլ հարց է` վերջնական մեղադրանքում դա սպանություն կդիտեն, թե գիտակցված ծանր մարմնական վնասվածքի հասցնում, որը առաջացրել է մահ: Այսինքն, այդ դեպքում էլ չի փոխվում մեղադրանքը, փոխվում է միայն հետևանքը»,- ասաց նա:

Նշենք` այսօր Լուրեր.com-ի հետ զրույցում Ոստիկանության հասարակայնության և լրատվության հետ կապերի վարչության աշխատակից Արմեն Մալխասյանը ասել էր, որ «Հարսնաքարի» գործով կալանավորվածների մեղադրանքում փոփոխություն չկա:

Հիշեցնենք, որ հունիսի 17-ի գիշերը ժամը 23:00-ին, ՀՀ ԱԺ պատգամավոր Ռուբեն Հայրապետյանի ընտանիքին պատկանող «Հարսնաքար» ռեստորանային համալիրի անվտանգության աշխատակիցները ծեծի էին ենթարկել ՀՀ ՊՆ Երևանի կայազորի հոսպիտալի քիթ–կոկորդ–ականջ բաժնի պետ, մայոր Վահե Ավետյանին, որին տեղափոխել էին «Մուրացան» զինվորական հոսպիտալ։ Հունիսի 29-ին ժամը 19.00-ի սահմաններում նա մահացավ:

Միջադեպի առնչությամբ հարուցվել է քրեական գործ ՀՀ քրեական օրենսգրքի 112 հոդվածի 2-րդ մասով, այն է՝ դիտավորությամբ առողջությանը ծանր վնաս պատճառելը երկու կամ ավելի անձանց նկատմամբ:

Կալանավորվել է 6 մարդ՝ Գարիկ Մարգարյանը, Արման Բաղդասարյանը, Դավիթ Ադամյանը, Արման Խաչատրյանը, Նորայր Հայրապետյանը և Արթուր Բաբլոյանը: