Ոստիկանության հանդեպ վերաբերմունքի հարցում վիճել չենք ուզում. ոստիկանությունը պարզաբանում է

ՀՀ Ոստիկանությունը հայտարարություն է տարածել, որում մասնավորապես ասված է.

«Հայկական ժամանակ» օրաթերթը իր թիվ 123-ի (5.07.2012 թ.) հրապարակումներից մեկում, չգիտես ինչու, կրկին շրջանառության մեջ է դրվել ոստիկանության կողմից ՀՀ ընտրողների թիվն ավելացնելու բամբասանքը, որը ժամանակին հերքվել է շուրջ քսան պարզաբանումներով: Եվ այնքան հիմնավոր է հերքվել, որ ընդդիմախոսների կողմից այդպես էլ որևէ համոզիչ առարկություն չհնչեց: Այնպես որ, անիմաստ ենք համարում այդ խնդրին կրկին անդրադառնալն ու պարզապես առաջարկում ենք վերընթերցել այդ պարզաբանում-հերքումները:

Ինչ վերաբերում է հրապարակման երկրորդ «թեմային», ապա այն առնվազն տարակուսանք է հարուցում: Նշելով, որ անցած տարվա առաջին հինգ ամիսների համեմատությամբ այս տարվա նույն ժամանակահատվածում հանցագործությունների թիվը նվազել է 5, իսկ մայիս ամսին' 25 տոկոսով, հոդվածագիրը թերահավատություն է դրսևորում ու անցնում երգիծանքի:

Ոստիկանության հանդեպ վերաբերմունքի հարցում վիճել չենք ուզում. յուրաքանչյուրի ճաշակի ու նախասիրության խնդիրն է, բայց վիճակագրությունը օբյեկտիվ մոտեցում է պահանջում:

Մասնավորապես, հակագիտական է` վերցնել մեկ ամսվա տվյալները ու դրա վրա մի ամբողջ տեսություն կառուցել, այն դեպքում, երբ վերլուծությունները կատարվում են եռամսյակային, կիսամյակային ու տարեկան հաշվարկների հիման վրա:

Հակատրամաբանական է լուրջ տեսքով խոսել ոստիկանության կողմից «թվեր նկարելու» մասին, երբ հարցին փոքրիշատե տեղյակ ամեն ոք գիտի' վիճակագրությունը ձևավորուն են նախաքննության ու հետաքննության բոլոր մարմինները, ցուցանիշները փոխադարձաբար վերահսկվում են, իսկ ընդհանուր հսկողությունն իրականացնում է դատախազությունը:

Հարգելի գործընկերնե՛ր, վերջապես, լուրջ իրողությունները լուրջ ուսումնասիրություն են պահանջում: Իսկ իրողությունն այն է, որ ոստիկանությունն առաջնահերթություն է հռչակել հանցագործությունների կանխարգելումը, արմատապես վերափոխել է պարեկապահակետային ծառայության աշխատանքը, ուժեղացրել է գիշերային ծառայությունը, ընդլայնել է համայնքային ոստիկանության գործունեության շրջանակը: Արդյունքում' նվազել են գողությունները, կողոպուտները, խուլիգանությունը, թմրամիջոցների անօրինական շրջանառության դեպքերը և այլն: Եվ վիճակագրությունն արձանագրել է արդյունքը: Այսինքն, ոչ թե երկրում հեղափոխություն է կատարվել, այլ ոստիկանությունը հետևողականորեն շարունակում է բարեփոխվել, ինչի համար կարելի է միայն ուրախանալ:

Ի դեպ, շուտով ոստիկանությունը կհրապարակի այս տարվա առաջին կիսամյակի ամփոփ վիճակագրությունը, որը նույնպես, հավաստիացնում ենք, արձանագրելու է հանցավորության նվազում, և մեր հարգելի գործընկերներին կոչ ենք անում անաչառ ու բարկայացակամորեն վերկուծել այս իրողությունն ու ընթացքը: