Դուրս կգա՞ արդյոք Մեծ Բրիտանիան ԵՄ-ից

Մեծ Բրիտանիայի` ԵՄ-ից դուրս գալու միտքը եթե առաջ անհնարին էր թվում, ապա այժմ աստիճանաբար դառնում է շատ հավանական։ Գրում է «Le Monde» հրատարակությունը։

Թոնի Բլերի կառավարության եվրոպական գործերի նախկին նախարար, լեյբորիստ պատգամավոր Դենիս Մաքշեինը նշում է. «Հիմա դա լրիվ հավանական է։ Բրիտանական կառավարությունը ոչ մի անգամ բաց չի քննարկել ԵՄ-ից դուրս գալու թեման։ Քննարկումը թափ է առել Բրյուսելում անցյալ շաբաթ տեղի ունեցած ԵՄ-ի գագաթաժողովից հետո։ Խոսակցությունները մասնավորապես կապված է Մեծ Բրիտանիայում ԵՄ-ին անդամակցությունը դադարեցնելու վերաբերյալ առաջիկայում հնարավոր հանրաքվե կազմակերպելու հետ»։

Բրյուսելի գագաթաժողովից վերադառնալուն պես Դևիդ Քեմերոնը նամակ է ստացել` ստորագրված հարյուրից ավելի պահպանողական պատգամավորների կողմից, որոնք պահանջել են խորհրդակցել այդ հարցի վերաբերյալ ժողովրդի հետ։ Իսկ նախկին պաշտպանության նախարար Լիամ Ֆոքսը հայտարարել է. «Կյանքն առանց ԵՄ-ի սարսափելի չէ»։ Քեմերոնը ներկայացուցիչների պալատում հայտարարել է, որ «հանրաքվեն հնարավոր է, բայց դա կլինի ոչ այդքան շուտ»։ Իսկ երկրի վարչապետը կարծում է, որ Մեծ Բրիտանիան պետք է մնա ԵՄ-ում՝ միասնական շուկայից օգուտ ստանալու համար, միևնույն ժամանակ քննադատելով բրյուսելյան օրենսդրությունը և չհամաձայնելով այնպիսի  գաղափարների հետ, ինչպիսիք են «քիչ ծախսեր և քիչ վարչարարություն» Բրյուսելի որդեգրած սկզբունքի հետ։

Նախկինում Լոնդոնը ԵՄ-ում միշտ հանդես է եկել համաձայնողի դերում, սակայն պատկերը փոխվեց 2011թ դեկտեմբերի գագաթաժողովից հետո, երբ Քեմերոնը մերժեց եվրոպական ֆինանսական կայունության համաձայնագիրը։ «Կեմերոնի գործողությունների մեջ կա նաև քաղաքական հաշվարկ»,-գրում է պարբերականը։