Ինչո՞ւ չեն վերաորակվել «Հարսնաքարի» գործով կալանավորվածներին առաջադրված մեղադրանքները

Հունիսի 17-ին Հարսնաքար ռեստորանում դաժան ծեծի ենթարկված ՀՀ ՊՆ Երևանի կայազորի հոսպիտալի քիթ-կոկորդ-ականջ բաժնի պետ, մայոր Վահե Ավետյանի մահվանից հետո նշանակվել է դատաբժշկական փորձաքննություն՝ պարզելու պատճառված մարմնական վնասվածքների և հետևանքի՝ տվյալ պարագայում մահվան միջև անմիջական պատճառ-հետևանքային կապի առկայությունը: Այս մասին այսօր լրագրողների հետ հանդիպման ժամանակ ասաց Ոստիկանության քննչական գլխավոր վարչության հատկապես կարևոր գործերի քննության բաժնի պետ Արսեն Այվազյանն՝ անդրադառնալով հարցին, թե ինչո՞ւ չի վերաորկվել կալանավորվածների հանդեպ առաջադրված մեղադրանքը:

«Այս պարագայում մենք չենք կարող մեղադրանք փոփոխել և եթե եզրակացության մեջ նշված լինի, որ մարմնական վնասվածքները պատճառահետևանքային կապի մեջ են մահվան հետ, միայն դրանից հետո կադրադառնանք այդ հարցին: Բնականաբար, այս դեպքում մենք վերաորակում կունենանք»,- ասաց Արսեն Այվազյանը:

Վերջինս նշեց, որ ՀՀ քրեական օրենքսգրքի 112-րդ հոդվածի երկրորդ մասի 14-րդ կետը նախատեսում է հենց մահվան ելքով ծանր մարմնական վնասվածքի առաջացում, այսինքն՝ անձի առողջությանը դիտավորությամբ ծանր վնաս պատճառելը, որն ազգուշությամբ առաջացրել է մահ: «Փորձաքննության եզրակացությունը ստանալուց հետո մենք պետք է կատարենք անհրաժեշտ այլ քննչական գործողություններ և ձեռք բերված ապացույցների համակցության մեջ կանդրադառնանաք այս վեց մեղադրյալների մեղադրանքների փոփոխության հարցին»,- ասաց Այվազյանը: