Ձերբակալվածներից մեկը Հարսնաքարի վարորդ-առաքիչն է եղել

«Հարսնաքար» ռեստորանում ՊՆ բժիշկներին դաժան ծեծի փաստի առթիվ հարուցված գործի շրջանակներում կալանավորվել են ռեստորանի 6 աշխատակիցներ, որոնք գործով մեղադրյալ են համարվում: Նրանց դեմ մեղադրանք է առաջադրվել քրեական օրենսգրքի 112-րդ հոդվածի 2-րդ մասի 1-ին և 6-րդ կետերով, այն է՝ մի խումբ մարդկանց կողմից ծանր վնասվածք պատճառելը, որը ենթադրում է 5-10 տարվա ազատազրկում: Իսկ յոթերորդ անձը՝ ռեստորանի մենեջերը, ազատ է արձակվել, քանի որ նախաքննության ընթացքում պարզվել է, որ նա ծեծի մասնակից չի եղել: Այս մասին այսօր լրագրողների հետ հանդիպմանն ասաց ՀՀ ոստիկանության քննչական գլխավոր վարչության հատկապես կարևոր գործերով քննության բաժնի պետ Արսեն Այվազյանը:

Քրեական գործի շրջանակներում կատարված հանցագործությանը մասնակացելու անմիջական կասկածանքով ձերբակալվել են Հարսնաքար ռեստորանի աշխատակցիներ Գարիկ Մարգարյանը (անվտանգության աշխատակից), Արման Խաչատրյանը (անվտանգության աշխատակից), Արման Բաղդասարյանը (անվտանգության աշխատակից), Նորայր Հայրապետյանը (անվտանգության աշխատակից), Արթուր Բաբլոյանը (վարորդ -առաքիչ) և Դավիթ Ադամյանը (մատուցող): Նրանց ձերբակալությունից հետո կատարվել են առաջնահերթ քննչական գործողություններ:

Բոլոր ձերբակալվածները ներկայացվել են տուժողներին, ընդհանուր առմամբ կատարվել է ճանաչման ներկայացնելու 28 քննչական գործողություն, որպես վկաներ հարցաքննվել են բազմաթիվ անձինք, ինչպես նաև կատարվել են այլ քննչական և դատավարական գործողություններ: