13 րոպե՝ մինչև լույսի խավարումը. The Washington Post

Սառը պատերազմի տարիներին ԱՄՆ–ը ուներ միջուկային մարտագլխիկներով վերգետնյա հրթիռներ, որոնք նախագահի հրամանով 3-4 րոպեում մարտական պատրաստվածության էին բերվում, գրում է The Washington Post–ը։ 

Այդ հրթիռներն իրական սպառնալիքի դեպքում մարտական պատրաստվածության բերելու համար 13 րոպեից քիչ ժամանակ էր պահանջվում, նշված է հոդվածում։

Երբ նախագահ Ջոն Քենեդիին պատմել են այդ հրթիռների հնարավորությունների մասին, վերջինս անհնարին է համարել դա։ 

«Եվ մենք մեզ մարդկություն ենք համարում», – ասել է Ջոն Քենեդին։

Սառը պատերազմից երկու տասնամյակ անց ԱՄՆ–ի ռազմավարական նշանակության հրթիռների մեկ երրորդը գտնվում է մարտական վիճակում, նշված է հոդվածում։ Վերջերս պաշտոնաթող գեներալ Ջեյմս Քարթրեյթը կոչ է արել վերանայել այդ վիճակը։ Նա ստեղծված իրավիճակի վերաբերյալ կազմված զեկույցում նշել է, որ ԱՄՆ–ը կարող է հրաժարվել մարտական վիճակի բերված հրթիռներից՝ ընդգծելով, որ դրանց մեկնարկումը նախընտրելի է իրականացնել 24–72 ժամվա ընթացքում։ 

2008–ի նախընտրական քարոզարշավի ընթացքում Բարաք Օբաման կոչ էր արել Ռուսաստանի հետ բանակցություններ անցկացնել մարտական պատրաստվածության բերված միջուկային մարտագլխիկներով հրթիռների վերաբերյալ։ Առաջիկա շաբաթներին ԱՄՆ նախագահ Բարաք Օբաման կստորագրի ռազմական դոկտրինի վերահաստատման մասին փաստաթուղթը, որում որևէ փոփոխություն չկա միջուկային մարտագլխիկներով մարտական պատրաստվածության բերված հրթինռերի կարգավիճակը փոխելու վերաբերյալ։ ԱՄՆ–ի զինուժի ռազմավարական հրամանատարության ղեկավար Ռոբերտ Քյոլերը հայտարարել է, որ դեմ է հրթիռները մարտական պատրաստվածության ռեժիմից դուրս բերելուն, քանի որ «դժվար է ստուգել, արդյո՞ք թշնամին չի նախապատրաստվում անկընկալ հարձակման»։ 

«ԱՄՆ–ն իր հրթիռները կպահպանի մարտական վիճակում, քանի դեռ Ռուսաստանը շարունակում է նույն կերպ գործել։ Թեև ԱՄՆ–ը և Ռուսաստանն այլևս չեն համարվում թշնամիներ, միջուկային պատերազմի հնարավորությունը կամ անսպասելի հարձակման հավանականությունը գրեթե զրո է», – նշված է հոդվածում։ 

Օբաման բազմիցս հայտարարել է աշխարհում խաղաղության և անվտանգության երաշխավորը լինելու մտադրության մասին։ 

«Այսօր ԱՄՆ–ը և Ռուսաստանն իրենց զինանոցում ունեն մոտ 1800 միջուկային մարտագլխիկ, որոնք գտնվում են մարտական պատրաստվածության վիճակում։ Դա ավելորդ և անհարկի ծախսեր է պահանջում, քանի որ Սառը պատերազմը վաղուց ավարտվել է։ Երկու գերտերությունները պետք է կրճատեն ռազմավարական նշանակության սպառազինության մակարդակը», – եզրափակում է պարբերականը։