Նախաքննական մարմինը տվել է իր պատասխանները. Ոստիկանություն

«Պահանջում ենք պատժել «Հարսնաքարում» տեղի ունեցածի բոլոր մեղավորներին» նախաձեռնությունն օրեր առաջ տարածած հաղորդագրության մեջ առաջ էր քաշել որոշ պահանջներ Հարսնաքարի գործի վերաբերյալ:

Ոստիկանության հասարակայնության հետ կապի և լրատվության վարչության աշխատակից Արմեն Մալխասյանը Lurer.com-ի հետ զրույցում պատասխանելով հարցին, թե ոստիկանությունը նախաձեռնության հայտարարությանն արձագանքելու է, թե՞ ոչ, նշեց միայն, որ նախաքննություն է ընթանում և մեր ասած հարցի վերաբերյալ նախաքննական մարմինը տվել է իր պատասխանները. «Եթե այլ նորություններ լինեն, կտեղեկացնենք»: 

Հիշեցնենք, որ նախաձեռնությունը պահանջում էր՝

• Դեպքի առնչությամբ հարուցված քրեական գործում Ռուբեն Հայրապետյանին ներգրավել որպես կասկածյալ ու ձերբակալել, ինչպես նաև քրեական գործում ներգրավել հունիսի 17-ի հանցագործության հետ առնչված բոլոր անձանց (մանրամասն' տե'ս նախաձեռնության հայտարարությունն առ 04.07.2012):

• Փաստի առթիվ հարուցված քրեական գործը վերցնել ոստիկանության վարույթից և տեղափոխել Հատուկ Քննչական Ծառայության վարույթ: Իրականացնել անկողմնակալ քննություն, լինել հաշվետու և բաց:

• Ապահովել տուժածների եւ նրանց հարազատների անվտանգությունը եւ բացառել հնարավոր ճնշումները նրանց նկատմամբ:

• «Հարսնաքար» համալիրը ճանաչել որպես քաղաքացու կյանքին կամ առողջությանը պատճառված վնասի համար պատասխանատու իրավաբանական անձ ու պարտադրել վնասի փոխհատուցում տրամադրել ՀՀ օրենսդրությանը համապատասխան: Դադարեցնել «Հարսնաքար» համալիրի գործունեությունը՝ կյանքի համար անվտանգ ծառայություններ մատուցելու անկարողության հիմնավորմամբ: