Ռուսաստանում համացանցի մասին նոր օրենքը՝ սուր քննադատության առարկա. The Washington Post

«Մտահոգիչ և վտանգավոր միտում», – այսպես է բնութագրել Ռուսաստանում համացանցի մասին նոր օրենքի ընդունումը՝ կապի հարցերով ԱՄՆ–ի դաշնային հանձնաժողովի ղեկավար Յուլիուս Ջինեչովսկին, գրում է The Washington Post–ը։

Ըստ ամերիկացի պաշտոնիայի, Ռուսաստանի պետդումայի կողմից չորեքշաբթի հաստատված համացանցի մասին նոր օրենքը սահմանափակում է խոսքի ազատությունը և քաղաքացիական իրավունքները։

«Համացանցի օգտագործման համաշխարհային փորձը հստակ դաս է՝ ազատ և բաց համացանցը նպաստում է տնտեսական աճին և ազատությանը, իսկ տեղեկատվության ազատ հոսքի սահմանափակումը բացասական ազդեցություն ունի սպառողների, բիզնեսի և հանրության վրա», – հայտարարել է Ջինեչովսկին։

Վիքիպեդիայի հիմնադիր Ջիմի Ուելսը համացանցի մասին Ռուսաստանում ընդունված նոր օրենքը համեմատել է «Ցանցահենության դեմ նախագծի հետ» (SOPA), որն ուղղված է ամերիկացիների դեմ։ 

«Այն ինչ խոչընդոտում է կամավոր տեղեկատվության տարածմանը, անընդունելի է մեզ համար», – հայտարարել է Ուելսը։