Մեզանում ամենաիրավազուրկ մարդիկ ցմահ բանտարկյալներն են. Ավետիք Իշխանյան

Այսօր լրագրողների հետ հանդիպմանը ցմահ դատապարտյալների խնդիրների մասին խոսեց Հայաստանի Հելսինկայն կոմիտեի նախագահ Ավետիք Իշխանյանը։ Բանախոսն իր խոսքում մասնավորապես նշեց, որ հասարակաության մեջ թյուր կարծիք է ձևավորվել ցմահ դատապարտյալների մասին, որոնց համարում են ապադասակարգային խավ։ Այսօր Հայսատանում այդ մարդիկ ամենաիրավազուրկն են, և նրանք էլ արդեն կարծես համակերպվում են այդ մտքի հետ։

Հայաստանում կա 105 ցմահ դատապարտյալ, ինչը բավականին մեծ թիվ է մեր երկուսուկես միլիոնանոց բնակչության պարագայում, այն դեպքում, երբ Լեհաստանի 38 մլն բնակչության դեպքում նրանց թիվը հասնում է 200-ի։

Այս թերացումն ուղղելու համար հիմնական ուշադրությունը պետք է բևեռել օրենսդրությանը և այն ավելի ճկուն դարձնել։Օրինակ, պետք է հաշվի առնել հանցագործության կատարման պահին անձի տարիքը, դատվածությունների քանակը, կատարված արարքի ծանրության աստիճանը, սպանությունների քանակն ու տեսակը, դատապարտյալի անձը։

Այսօր Հայաստանում 100 ցմահ դատապարտյալներից 41-ը դատապարտվել է մեկ անձի սպանության մեղադրանքով։ 41-ից 26-ը՝ առաջին դատվածությամբ, 15-ը՝ զինծառայության ընթացքում տեղի ունեցած հանցագործությունների մեղադրանքով՝ 18-20 տարեկանում։

Կան անձինք, ովքեր դատապարվել են ցմահ՝ սոսկ հանցագործությանն օժանդակելու համար։ Եվրոպական երկրների ճկուն մեխանիզմները մեզանում առայժմ տեղ չեն գտել։

Եթե Հայաստանում կիրառվեն այդպիսի մեխանիզմներ, ապա ցմահ դատապարտյալների թիվն էականորեն կկրճատվի։