Սա լկտիություն է, մենք մեր ընկերոջը չենք թողնի բանտում. Արամ Մանուկյան

Ի պաշտպանություն քաղբանտարկյալ, ՀԱԿ ակտիվիստ Տիգրան Առաքելյանի կլինեն ակցիաներ և՛ ՀԱԿ-ի կողմից, և՛ ՀՀՇ-ի կողմից: Այս մասին Լուրեր.com-ի հետ զրույցում ասաց ԱԺ պատգամավոր, Հայ ազգային կոնգրեսի ներկայացուցիչ Արամ Մանուկյանը, և հավելեց, որ իրենք պատրաստ են բոլոր ակցիաներով պաշտպանելու Տիգրան Առաքելյանին:

«Սա իշխանությունների կողմից լկտիության դրսևորում է: Մենք սպասում էինք, որ միգուցե խոհեմություն կունենան, բայց եթե իրենք իրենցն են անում, մենք մեր ընկերոջը չենք թողնի բանտում»,- ասաց Մանուկյանը:

Նա նշեց նաև, որ իրենց պատվիրակությունը երեկ է վերադարձել Թիֆլիսից:

«Հարավային Կովկասի լիբերալ քաղաքական ուժերի հետ համատեղ եղել են հանդիպումներ, որտեղ և քննարկվել է քաղբանտարկյալների հարցը: Մենք պայմանավորվածություններ ունենք երեք քաղաքական ուժերով, անկախ նրանից, որ երկրում են քաղբանտարկյալները պաշտպանում ենք նրանց շահերը: Այս տարբերակի դեպքում, Տիգրան Առաքելյանին ազատելու համար մենք մեր բոլոր հնարավորությունները կօգտագործենք և՛ Հայաստանում, և՛ Հայաստանից դուրս»,- ասաց նա:

Մանուկյանի խոսքերով, եթե իշխանությունները շարունակեն իրենց այս տեսակի մոտեցումը, իրենք ունեն լայն հնարավորություններ դիմելու միջազգային կառույցներին՝ միջազգային աղմուկ բարձրացնելու համար:

«Նշեմ, որ ընդամենը 15-20 օր առաջ միջազգային ճնշումների ազդեցության տակ Ադրբեջանում մի շարք քաղբանտարկյալներ ազատվել են: Մենք հանդիպել ենք այդ քաղբանտարկյալներին նաև Թբիլիսիում: Մի խսքով էժան չի նստի իշխանությունների վրա, եթե այդպես կոշտ մեթոդներով են գնում, մենք էլ մեր մեթոդները կբանեցնենք»,- եզրափակեց Մանուկյանը:

Հիշեցնենք, որ օրեր առաջ Երևանի Կենտրոն և Նորք Մարաշ վարչական շրջանների դատարանում, մեղադրող դատախազ Հակոբ Մարտիրոսյանը հնչեցրել է իր մեղադրական ճառը ՀԱԿ ակտիվիստներ Տիգրան Առաքելյանի, Արտակ Կարապետյանի, Սարգիս Գևորգյանի և Դավիթ Քիրամիջյանի գործով։

Դատախազը Տիգրան Առաքելյանի համար 6 տարի է պահանջել, Արտակ Կարապետյանի դեպքում մեղմացուցիչ հանգամանք է համարվել այն, որ նա ունի 1 անչափահաս երեխա, և դատախազը պահանջել է 3 տարի 5 ամիս 19 օրվա ազատազրկում:

Սարգիս Գևորգյանը, ըստ դատախազի, պետք է անազատության մեջ գտնվի 1 տարի 11 ամիս 20 օր, իսկ Դավիթ Քիրամիջյանը՝ 2 տարի:

Դատախազը նշել է, որ առաջադրված մեղադրանքները հիմնավորված են:

Գայանե Համբարձումյան