Հայ ազգային կոնգրեսի ակտիվիստները չեն ճանաչում իրենց մեղքը

Այսօր Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում պաշտպանական ճառով հանդես եկավ ՀԱԿ ակտիվիստների պաշտպան Ստեփան Ոսկանյանը, ով հայտարարեց, որ ակտիվիստները մեղավոր չեն և չեն էլ ճանաչում իրենց մեղքը։ Պաշտպանը ասաց նաև, որ միջադեպը տեղի չէր ունենա, եթե ոստիկանները գործեին իրենց լիազորությունների շրջանակներում։

Դատավարության ընթացքում դատարանի շենքի մոտ հավաքված Հայ Ազգային Կոնգրեսի ակտիվիստները բողոքի ակցիա էն անցկացրել՝ պահանջելով արդար դատավճիռ Կոնգրեսի երիտասարդների համար:

Դատավարությանը ներկա են եղել Կոնգրեսի ներկայացուցիչներ Վահան Վարդապետյանը, Աշոտ Սարգսյանը և Արմեն Խաչատրյանը, ՀԱԿ խմբակցության պատգամավորներ Լևոն Զուրաբյանն ու Նիկոլ Փաշինյանը։ 

Նշենք, որ օրեր առաջ Երևանի Կենտրոն և Նորք Մարաշ վարչական շրջանների դատարանում մեղադրող դատախազ Հակոբ Մարտիրոսյանը հնչեցրել է իր մեղադրական ճառը ՀԱԿ ակտիվիստներ Տիգրան Առաքելյանի, Արտակ Կարապետյանի, Սարգիս Գևորգյանի և Դավիթ Քիրամիջյանի գործով։

Դատախազը Տիգրան Առաքելյանի համար 6 տարի է պահանջել, Արտակ Կարապետյանի դեպքում մեղմացուցիչ հանգամանք է համարվել այն, որ նա ունի 1 անչափահաս երեխա, և դատախազը պահանջել է 3 տարի 5 ամիս 19 օրվա ազատազրկում:

Սարգիս Գևորգյանը, ըստ դատախազի, պետք է անազատության մեջ գտնվի 1 տարի 11 ամիս 20 օր, իսկ Դավիթ Քիրամիջյանը՝ 2 տարի:

Դատախազը նշել է, որ առաջադրված մեղադրանքները հիմնավորված են:

Հիշեցնենք նաև, որ յոթ երիտասարդներ 2011-ի օգոստոսի 9-ին Երևանի Կարապի լճի հարակից տարածքում ոստիկանների հետ բախում էին ունեցել, որի հետևանքով էլ բերման էին ենթարկվել և հաջորդ օրն իսկ ձերբակալվել: Նրանցից 6-ին չբացակայելու ստորագրությամբ ազատ էին արձակել, իսկ Տիգրան Առաքելյանը շարունակում է կալանավորված մնալ, քանի որ մեղադրվում է իշխանության ներկայացուցչի նկատմամբ բռնություն գործադրելու մեջ։