Մի դրվագ հայաստանյան «արդարադատությունից». դատավորը որոշեց 40.600 դոլար գանձել թոշակառուներից

Վարչական առաջին ատյանի դատարանի դատավոր Կարինե Բաղդասարյանի վերջին վճիռն առանց հումորի դժվար է ընկալել: Նա վճռել է Վարչական դատարան կոլեկտիվ հայց ներկայացրած 26 բնակիչներից բռնագանձել 40.600 դոլարին համարժեք դրամ՝ հօգուտ տխրահռչակ «Լիբեր» շինկազմակերպություն ՍՊԸ-ի:

Մինչ այդ, 2011թ. օգոստոս ամսին նույն դատավորը ոչ միայն վարույթ էր ընդունել բնակիչների հայցը՝ ընդդեմ նախորդ քաղաքապետեր Երվանդ Զախարյանի և Գագիկ Բեգլարյանի կողմից «Լիբերին» տրված՝ Կոմիտասի 5 հասցեում 477 քառակուսի մետր տարածքի ապօրինի մասնավորեցման մասին որոշման և բարձրահարկ բազմաբնակարան շենքի ու էլեկտրաքարշի նոր ենթակայանի կառուցման շինթույլտվության, այլև արգելանք էր դրել շինարարական այդ աշխատանքների վրա՝ մինչև գործի քննության ավարտը:

«Լիբերը» այս որոշումը բողոքարկել էր Վերաքննիչ վարչական դատարան, որը բեկանել էր վարչական առաջին ատյանի դատարանի որոշումը: Իսկ բնակիչներն էլ բողոքարկել էին Վերաքննիչ վարչական դատարանի որոշումը և ստացել Վճռաբեկ դատարանի պաշտպանությունը: Վճռաբեկ դատարանը հաստատել էր, որ բնակիչների հայցը ենթակա է քննության, նաև ուժի մեջ էր թողել Վարչական առաջին ատյանի դատարանի որոշմամբ շինարարության իրականացման արգելանքը՝ հետևաբար բնակիչների փաստարկները համարելով հիմնավոր:

Այժմ «Լիբերը» պնդում է, որ բնակիչների հայցի հիման վրա շինարարական աշխատանքների արգելանքի կիրառումը իրեն 40.600 դոլարի վնաս է պատճառել, քանի որ նա դեռ 2011թ.-ի մարտին վարկ էր վերցրել և վճարում է դրա տոկոսները: Այդ հիմքով ընկերությունը պահանջում է վնասը (վարկի տոկոսները) գանձել բնակիչներից: Սակայն իր այդ պահանջի մեջ «Լիբերը» անգամ մեկ հիմնավոր ապացույց չի ներկայացրել այդ վարկի և Կոմիտասի 5 հասցում կատարվելիք շինարարության միջև առնչության վերաբերյալ. չէ՞ որ «Լիբերը» որպես շինկազմակերպություն վարկային այդ պայմանագիրը կարող էր կնքած լինել բոլորովին այլ շինարարության նպատակով:

Մի խոսքով, «Լիբերը» խնդրել էր դատարանից պահանջել Կոմիտասի 5ա շենքի 26 բնակիչներից (որոնց թվում, ի դեպ, կան բազմաթիվ թոշակառուներ և սոցիալապես անապահով խավի ներկայացուցիչներ) 40.600 դոլար, ընդ որում` եռօրյա ժամկետում, կամ էլ հանել շինարարության վրա դատարանի կողմից կիրառված արգելանքը: Եվ ահա 18.07.2012թ.-ին դատավոր Կարինե Բաղդասարյանը բավարարեց «Լիբերի» այդ միջնորդությունը այն դեպքում, երբ այդ շինարարության արգելքի որոշումը կայացրել է հենց ինքը և որը հաստատել է Վճռաբեկ դատարանը:

Մենք մեկնաբանություն խնդրեցինք այս վճռի կապակցությամբ մի ծանոթ դատավորից, որը, խնդրելով չհրապարակել իր անունը, նշեց, որ իր պրակտիկայում չի հիշում նման մի դեպք:

Ի դեպ, բնակիչների պնդմամբ, օրերս նրանք հանդիպել են հարևան բակ այցելած քաղաքապետ Տարոն Մարգարյանին, ով խոստացել է, որ առանց բնակիչների համաձայնության նրանց շենքի դիմաց ոչ մի նոր շենք թույլ չի տա կառուցել: Արդյոք քաղաքապետը կկատարի՞ իր խոստումը:

Նելլի Ավետիսյան