ԱԺ ընտրություններն ուղեկցվեցին լրագրողների նկատմամբ ֆիզիկական բռնության 3 միջադեպով

Խոսքի ազատության պաշտպանության կոմիտեն հրապարակել է երկրորդ (ապրիլ-հունիս, 2012 թ.) եռամսյակային զեկույցը: Զեկույցի համառոտ ամփոփումը ներկայացնում ենք ստորև.

«Խոսքի ազատության պաշտպանության կոմիտեն հետամուտ է հայաստանյան լրատվամիջոցների և դրանց աշխատակիցների գործունեությանն առնչվող պայմաններին, իրադարձություններին ու խնդիրներին եւ հանրությանն է ներկայացնում եռամսյակային ու տարեկան զեկույցներ՝ Հայաստանում խոսքի ազատության վիճակի, ԶԼՄ-ների և լրագրողների իրավունքների խախտումների վերաբերյալ։ Դրանցում ներառվում են ոլորտը կարգավորող օրենսդրության փոփոխությունները, վերջիններիս առնչվող առաջարկություններն ու գործընթացները, ինչպես նաև՝ քաղաքական գործոնների և տնտեսական միջավայրի ազդեցությունները լրատվամիջոցների վրա:

2012 թ. երկրորդ եռամսյակում ԶԼՄ-ների գործունեության իրավական դաշտին վերաբերող գործընթացներում ուշագրավ է երկու զարգացում։
Ապրիլի 25-ին ՀՀ կառավարությունը ՀՀ Ազգային ժողովի նախագահին ներկայացրեց իր եզրակացությունը՝ Երևանի մամուլի ակումբի, «Ինտերնյուս» ՀԿ-ի եւ Խոսքի ազատության պաշտպանության կոմիտեի պատրաստած' «Հեռուստատեսության և ռադիոյի մասին» օրենքի նախագծի լրամշակված տարբերակի մասին։ Ըստ այդմ' կշարունակվեն քննարկումները օրինագծի կատարելագործման ուղղությամբ։

Ապրիլի 27-ին ՀՀ վճռաբեկ դատարանը նախադեպային որոշում կայացրեց՝ կատարելով ՀՀ քաղաքացիական օրենսգրքի 1087.1 հոդվածի դրույթների կանոնակարգումներ (պատվին, արժանապատվությանը կամ գործարար համբավին պատճառված վնասի հատուցման կարգի եւ պայմանների մասին)։ Սակայն այդ որոշման վերլուծական եզրակացություններում առկա է երկու մտահոգիչ հանգամանք՝ կապված «տեղեկատվության աղբյուր» հասկացության եւ տեղեկատվական վեճերի արտադատական լուծումները թերագնահատելու հետ։

ԶԼՄ-ների գործունեության վրա քաղաքական միջավայրի ազդեցության առումով՝ նախորդ տարիներին ԽԱՊԿ-ն նկատել է այն օրինաչափությունը, որ համապետական կամ տեղական ինքնակառավարման մարմինների ընտրությունների ընթացքում լրագրողների և լրատվամիջոցների նկատմամբ ճնշումները նկատելիորեն աճում են։ Այս տարվա մայիսի 6-ի խորհրդարանական ընտրություններն ուղեկցվեցին լրագրողների նկատմամբ 3 ֆիզիկական բռնության և 4 տեղեկատվություն ստանալուն ու տարածելուն խոչընդոտող միջադեպով։ Թեև 2008 թ. ընտրությունների համեմատ' իրավիճակն ավելի մեղմ էր, այնուամենայնիվ, նկատելի է, որ 2012 թ. առաջին եռամսյակի համեմատ' երկրորդ եռամսյակում, որը ներառում է ընտրական շրջանը, ԶԼՄ-ների գործունեության պայմանները բարդացան։»