Հուրգադա-Երևան չվերթի չեղարկման պատճառը մոնոպոլիա՞ն է

Եգիպտոսից Երևան չվերթի չեղարկման պատճառով այս պահին Հուրգադայում է մոտ 100 ՀՀ քաղաքացի։ ԼՈՒՐԵՐ․com-ի հետ զրույցում գրող Վահե Արսենը դժգոհեց՝ նշելով, որ արդեն 24 ժամ է՝ հարյուրից ավելի հայ տուրիստների թվում իր կինն ու 2 զավակներն են, որոնք մնացել են Եգիպտոսում։

«Մի մասն արդեն փողոցում են, որովհետև ոչ գումար ունեն և ոչ էլ տեր՝ ի դեմս Եգիպտոսում մեր դեսպանության: Արտաքին գործերի նախարարությունն ու քաղ. ավիացիան լղոզված պատասխաններ են տալիս: Այսօր առավոտյան 08։30-ին պետք է հասնեին Երևան, արդեն երեկ պարզվել էր, որ ինքնաթիռ չկա, որ հետ վերադառնան։ Իսկ մեր դեսպանատունը հաղորդագրություն տարածեց իմ ֆեյսբուքյան գրառումից հետո միայն, ինչը խոսում է նրանց աշխատելաոճի մասին»,- ասաց նա:

ՀՀ քաղաքացիները օգտվել են «Ժանել» տուրիստական ընկերության ծառայությունից։ Այստեղից փորձեցինք հետաքրքրվել, թե որն է չվերթի չեղարկման պատճառը, սակայն ԼՈՒՐԵՐ․com-ի հետ զրույցում պատասխանեցին, որ զբաղված են, որևէ բան ասել չեն կարող՝ ուղղորդելով զանգահարել չարտերային թռիչքը կազմակերպած «Էյ ընդ Ար Տուր» ավիաընկերության կազմակերպիչներին։ Այս ընկերությունից ևս մեր բազմաթիվ զանգերին չպատասխանեցին։

Ըստ տեղեկությունների՝ խնդիրն առաջացել է մոնոպոլիայի պատճառով։ Բանն այն է, որ մինչ այս միայն «Մարաթուկ» տուրիստական ընկերությունն է իրականացրել դեպի Հուրգադա չվերթները, այժմ նաև՝ «Էյ ընդ Ար Տուր» ընկերությունը։ Վերջինիս հետ հակամարտության և մրցակցության հետևանքով «Մարաթուկ» ընկերությունը, որոշակի լծակներ օգտագործելով, հասել է նրան, որ մարդիկ հայտնվեն այս իրավիճակում։

Ավելի ուշ մեզ հետ կապ հաստատեց «Մարաթուկ» տուրիստական ընկերության հիմնադիր Զորիկ Վարդանյանը, ով նշեց, որ ինքը մոնոպոլ դիրք չի զբաղեցնում, քանի որ իր ընկերությունից ավելի շատ չվերթներ իրականացնող ընկերություններ կան՝ «Անռիվա»-ն և «Սքայ տուր»-ը, որոնք ևս իրականացնում են չվերթներ դեպի Հուրգադա և Շարմ էլ Շեյխ. «Մոնոպոլիստը նա է, որը միայն ինքն է տվյալ ուղղությամբ չվերթն իրականացնում: Ես լծակներ չունեմ արաբական երկրում, որ Եգիպտոսի նախագահին ասեմ ինձ համար անի այն, ինչը ես ուզում եմ: Ես այսօրվա ռեյսին 40 անձի տեղափոխել եմ Եգիպտոս, եթե նման ցանկություն ունենայի, ուղևորափոխադրում չէի անի: Իսկ իրական պատճառն այն է, որ «Էյ ընդ Ար Տուր»-ը գումարը չի վճարել դրա համար էր ինքնաթիռը չի թռել»,- ասաց Զորիկ Վարդանյանը: 

Ինչպես արդեն տեղեկացրել ենք՝ Եգիպտոսում ՀՀ դեսպանությունը հաղորդագրություն էր տարածել՝ նախ հաստատելով չվերթի չեղարկման մասին, ապա նշելով, որ դեսպանությունը մշտական կապի մեջ է վերոհիշյալ քաղաքացիների, ինչպես նաև՝ փոխադրող ընկերության հետ, և ձեռնարկում է բոլոր հնարավոր քայլերը՝ խնդիրը կարգավորելու համար։ Դեսպանությունը տրամադրել է նաև Եգիպտոսում ՀՀ դեսպանության թեժ գծի հեռախոսահամարը՝ +20 120 705 0580:

Հիշեցնենք, որ հուլիսի 23-ին էլ Շարմ էլ Շեյխ-Երևան և հակառակ ուղղությամբ չարտերային չվերթները չէին կայացել, որի հետևանքով տասնյակ ուղևորներ չէին կարողացել մեկնել հանգստի կամ վերադառնալ։