Կրթական ծրագրեր քրեակատարողական հիմնարկներում

Հայաստանի երիտասարդական հիմնադրամը (ՀԵՀ) հուլիսի 26-ին ՀՀ արդարադատության նախարարության «Վանաձոր» քրեակատարողական հիմնարկում բացեց համակարգչային լսարան։ Այստեղ դատապարտյալների շրջանում կկազմակերպվեն դասընթացներ. կուսուցանվեն համակարգչային տարբեր ծրագրեր։

ՀԵՀ հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանը նշեց, որ այս լսարանը հնարավորություն կտա անազատության մեջ գտնվող քաղաքացիներին չկտրվել ընթացող զարգացումներից։ «Այսօր առանց համակարգչի դժվար է պատկերացնել կյանքը, և մեր նպատակն է անազատության մեջ գտնվող մարդկանց համակարգչային գիտելիքներ ձեռք բերելու, դրանք զարգացնելու հնարավորություն ընձեռել։ Նրանք դուրս են գալու քրեակատարողական հիմնարկից, և չպետք է հետ մնան մեր կյանքի զարգացումներից»,- նշեց Կ. Ավագյանը։ Նա նաև տեղեկացրեց, որ քրեակատարողական հիմնարկի ղեկավարության հետ դատապարտյալների շրջանում մի շարք ծրագրեր իրականացնելու պայմանավորվածություն է ձեռք բերվել։ Բացի այդ, կհամալրվի քրեակատարողական հիմնարկի 800 կտոր գիրք ունեցող գրադարանային ֆոնդը։

«Վանաձոր» քրեակատարողական հիմնարկի ղեկավար Արտյոմ Մխոյանը տեղեկացրեց, որ համակարգիչներն օգտագործվելու են կրթական ծրագրեր իրականացնելու համար։ Համակարգչային ծրագրերը կդասավանդեն ՀԵՀ-ի Լոռու մարզային կենտրոնի մասնագետները։ Այդ դասընթացներից կօգտվեն բոլոր դատապարտյալները։

Դատապարտյալ Էդիկ Շահնազարյանը համակարգչային տեխնիկային չի տիրապետում և հույս ունի, որ մինչև ազատություն ստանալը կհասցնի յուրացնել համակարգչային գիտելիքները։ Նա կարևորում է նման նախաձեռնությունները, քանի որ դրանք ոչ միայն իրենց զբաղվածության հարցն են լուծում, այլև նպաստում են ինտելեկտուալ զարգացմանը։

ՀԵՀ-ի կողմից քրեակատարողական հիմնարկներում համակարգչային լսարանների բացման ծրագիրը շարունակական է։ Առաջիկայում նման լսարաններ կբացվեն նաև այլ հիմնարկներում։