Վահե Ավետյանի հայրը վերջապես ճանաչվեց՝ որպես տուժողի իրավահաջորդ

Երեկ վերջապես վարույթն իրականացնող մարմնի` քննչական խմբի ղեկավար Ռ. Մկրտչյանն իր մոտ էր հրավիրել Վահե Ավետյանի հայր Գառնիկ Ավետյանին` տուժողի իրավահաջորդ ճանաչելու նպատակով: Դրան նախորդել էր նրա փաստաբաններ Տիգրան Եգորյանի և Լուսինե Հակոբյանի կողմից սույն թվականի հուլիսի 11-ին իրենց վստահորդի անունից ներկայացված դիմումը, որով նրանք խնդրել էին վարույթն իրականացնող մարմնին ճանաչել Գ. Ավետյանին որպես տուժողի իրավահաջորդ:

Այդ հարցին արագ լուծում տալու փոխարեն քննչական խմբի ղեկավար Ռ. Մկրտչյանը և նրա վերադասը կապվել էին փաստաբանների հետ և պահանջել, որպեսզի դիմում ներկայացվի անձամբ Գ. Ավետյանի կողմից` ասելով, որ լիազորված ներկայացուցիչների կողմից ներկայացված դիմումը բավարար հիմք չէ: Այդ ընթացքում փաստաբանները բողոքարկել էին վարույթն իրականացնող մարմնի գործողությունները ՀՀ գլխավոր դատախազություն, և ահա երեկ, Գառնիկ Ավետյանի` որպես տուժողի իրավահաջորդ ներգրավվելու ցանկությանը ուղիղ երկու շաբաթ հստակորեն իրազեկ լինելուց հետո միայն, քննչական խմբի ղեկավարն իր մոտ էր հրավիրել նրան՝ այդ գործողությունը վերջապես իրականացնելու նպատակով: Հրավիրելուց հետո անգամ տուժողի հայրը և իր փաստաբանները ՀՀ քննչական գլխավոր վարչության մուտքի մոտ ստիպված էին սպասել, քանի որ քննիչը չէր պատասխանում ոչ փաստաբանի և ոչ էլ Գառնիկ Ավետյանի զանգերին:

Դրանից հետո էլ նրան թույլ չտրվեց բարձրանալ փաստաբանների հետ, և փաստաբանները հրավիրվեցին այն բանից հետո միայն, երբ քննիչը մոտ երկու ժամանոց «բացատրական աշխատանք» էր տարել տուժողի հոր հետ` նրա մոտ բարձրացնելով իր փաստաբանների կոմպետենտության հետ կապված հարցեր և անգամ համոզելով նրան հետաձգել ցուցմունք տալը` պատճառաբանելով, որ նա համապատասխան հոգեբանական վիճակում չէ: Փաստաբանները վերջապես հրավիրվեցին, քանի որ իրենց վստահորդը պնդել էր, որ ցանկանում է, որ իր ներկայացուցիչները ներգրավվեն արագ և որ ինքը պատրաստ է անմիջապես ցուցմունք տալ: Գառնիկ Ավետյանը երեկ ուշ երեկոյան տվել է իր ցուցմունքը` իր փաստաբանների ներկայությամբ:

Հարկ է նշել նաև, որ «Հարսնաքարի» գործով քննչական խմբի գործողությունները ամենայն աչալրջությամբ «վերահսկվում» է Վահագն Հարությունյանի կողմից, որը մարտի 1-ի գործով տխրահռչակ քննչական խմբի նախկին ղեկավարն է: