Անանուն նամականերին չարձագանքելը մակերեսային մոտեցում է. Արթուր Սաքունց

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, Lurer.com–ի զրույցում մեկնաբանելով ՊՆ խոսնակ Արծրուն Հովհաննիսյանի արտահայտած այն տեսակետը, որ ՊՆ–ն չի արձագանքում անանուն նամակներին, ասաց, որ ինքը հասկանում է ՊՆ–ի պատասխանը։ 

«Իրենք չեն ուզում անանուն նամակներին արձագանքել, բայց խնդիրը երևի թե տվյալ դեպքում ունի մի կողմ, որին պետք է, այնուամենայնիվ, ուշադրություն դարձնենք։ Ելնելով մեր ուսումնասիրություններից՝ մենք հայտարարության մեջ հստակ գրել էինք, որ մեր մտահոգությունը կապված է Զինված ուժերի վիճակի և օրենսդրության հետ, որ ներքին բողոքարկման մեխանիզմները արդյունավետ չեն Զինված ուժերում։ Այսինքն, եթե լինեին արդյունավետ, ապա մարդիկ կարող էին առանց վախենալու, խուսափելու, մտահոգվելու իրենց բողոքները ներկայացնելու վերադասին, բայց քանի որ այդ մեխանիզմներն արդյունավետ չեն, դրա համար ստիպված են նման ձևերով խնդիրների մասին ահազանգել։ Ես հորդորում եմ ՊՆ–ին ոչ թե ձևի ետևից ընկնել, այլ բովանդակությանն ուշադրություն դարձնել և առաջին հերթին այդ նամակներում նշված հարցերի ուղղությամբ լուրջ ուսումնասիրություն կատարել և համոզվել՝ արդյոք այդ անանուն նամակի բովանդակությունն էլ է ձևին համապատասխանում», – նշեց Սաքունցը։

Հարցին, թե իրենք որևէ լրացուցիչ տեղեկատվություն այս պահին ունե՞ն՝ զորամասում իսկապե՞ս նման բան տեղի է ունենում, թե՞ ոչ, Արթուր Սաքունցն ասաց, որ զորամասերում իրավիճակն այնպես է փակված, որ իրենք նման հնարավորություն չունեն։

«Մենք հնարավորություն և իրավունք չունենք զորամասեր այցելելու։ Մարդիկ ընդամենը մեզ նամակ են ուղարկում և մենք ունենք այդ աղբյուրը։ Ինչպես նաև կան ոչ կանոնադրական հարաբերությունների, մահացության դեպքեր, որոնց վերաբերյալ էլ մենք տեղեկանում ենք հենց ծնողներից»։ 

Արթուր Սաքունցը ներկայացրեց նաև ՊՆ քննչական ծառայության պետ Արմեն Հարությունյանի կողմից Ժնևում խոշտանգումների կանխարգելման կոմիտեի նիստի ժամանակ 2011 թվականի հաշվետվությունը, որի մեջ նշում է, որ այդ տարում տեղի է ունեցել 1085 հանցագործություն, 317 գործ է ստացվել կապված հանցագործությունների հետ և շատ դեպքերում հետաքննություն չի իրականացվել, քանի որ իրական հանցանք չի կատարվել, 313 դեպքով քրեական գործեր են հարուցվել, 218 գործ ուղարկվել է դատարան, 3 դեպքում քրեական գործը դադարեցվել է, քանի որ մեղադրանքը վերացել է, 191 դեպք դատավարության փուլում է, դեպքերից 80-ում կան դատապարտվածներ և ըստ իրենց՝ մահվան 36 դեպք։ «Այս պատկերը և կոնկրետ մի կորպուսի հետ կապված մտահոգություններն, իհարկե, անհամապատասխան են։ Եվ հիմա անանուն նամակներին չարձագանքելը մակերեսային մոտեցում է։

Դեռևս 2010 թվականին գեներալ Միքայել Գրիգորյանը նամակ էր ուղղել ՊՆ նախարարին, որտեղ բազմաթիվ հարցեր էին բարձրացված Զինված ուժերում իրավիճակի մասին։ Այդ նամակն էլ արդեն անունով էր, իսկ այդ ժամանակ խնդիրների վերաբերյալ ի՞նչ արեց ՊՆ–ն։ Այսինքն՝ նախարարին ուղղված նամակը ևս մնաց անուշադրության։ Եվ այդ ժամանակ ավելի շատ ՊՆ–ին հետաքրքրում էին ոչ թե նամակում նշված խնդիրները, այլ՝ թե ինչպես է նամակն իրենց ձեռքն ընկել»։

Հիշեցնենք, որ 2012 թ. հուլիսի 26-ին ՀՔԱ Վանաձորի գրասենյակն էլեկտրոնային փոստով նամակ էր ստացել ՀՀ զինված ուժերի զորամասերից մեկի շարքային զինծառայող Թաթուլ Գրիգորյանի կողմից զորամասում անօրինականությունների, բռնությունների, ճնշումների վերաբերյալ: Նշվում է, որ նա նույն զորամասի հրամանատարի տեղակալի (կոչումով գնդապետ) եղբոր տղան է, որը Հանրապետական կուսակցության անդամ, ՀՀ ԱԺ պատգամավորի որդի է:

Ազատուհի Արասխանյան