ՀՀ աշխատանքի և սոցիալական հարցերի նախարարության աշխատակիցները դատապարտվեցին ազատազրկման

Երևանի Աջափնյակ և Դավթաշեն վարչական շրջանների դատարանը՝ դատավոր Դավիթ Բալայանի նախագահությամբ, հուլիսի 30-ի դատավճռով ՀՀ աշխատանքի և սոցիալական հարցերի նախարարության սոցիալական ապահովության պետական ծառայության «Դավթաշենի» տարածքային բաժնի արդեն նախկին պետ Սարգիս Հակոբյանին դատապարտեց 7 տարվա ազատազրկման: Դատավճռով նրանից կբռնագրավվի անձնական գույքի կեսը ոչ ավելի, քան 1 մլն. 562 510 ՀՀ դրամի չափով: Ս. Հակոբյանը դատավճռով զրկվեց պետական ու տեղական ինքնակառավարման մարմիններում որոշակի պաշտոններ զբաղեցնելու իրավունքից՝ 2 տարի ժամկետով:

ՀՀ աշխատանքի և սոցիալական հարցերի նախարարության սոցիալական ապահովության պետական ծառայության նույն տարածքային բաժնի գլխավոր մասնագետ Գրետա Վարդանյանը դատապարտվեց 3 տարվա ազատազրկման՝ անձնական գույքի կեսի բռնագրավմամբ: Նա երկու տարի ժամանակով զրկվեց պետական ու տեղական ինքնակառավարման մարմիններում որոշակի պաշտոններ զբաղեցնելու իրավունքից: Նրա նկատմամբ դատարանը կիրառեց առավել մեղմ պատիժ՝ հաշվի առնելով, որ ակտիվորեն աջակցել է գործի քննությանը, մասնավորապես, իր նախկին ղեկավարի դեմ տվել է մերկացնող ցուցմունքներ:

Ամբաստանյալներ՝ նախկին բորտուղեկցորդուհի Կարինե Խալաթյանի, նախկին օդաչուներ Միխայիլ Եֆրեմյանի, Աշոտ Թունյանի, Տիգրան Սիմոնյանի, Սեյրան Հովհաննիսյանի և Ծիրուն Ասատրյանի նկատմամբ կիրառվեց ՀՀ անկախության 20-րդ տարեդարձին նվիրված համաներման մասին որոշումը, և նրանք ազատվեցին պատժի կրումից: Համաներմամբ պատժի կրումից ազատվեցին նաև համատիրության ղեկավար Ժորա Ղուկասյանը և հաշվապահ Ալինա Գևորգյանը: Նրանք, ի դեպ, արդեն իսկ վերականգնել են իրենց գործողություններով պետությանը հասցված վնասը:

Ըստ մեղադրանքի, Սարգիս Հակոբյանը՝ աշխատելով վերոհիշյալ պաշտոնում, տեղյակ է եղել բաժնի ընթացիկ գործունեությանը, այն է' 2009թ. օգոստոսից մինչև 2010թ. փետրվարն ընկած ժամանակահատվածում ՀՀ ավիացիայի գլխավոր վարչության աշխատակից, այժմ հանգուցյալ' Է. Մ.-ի կազմակերպմամբ և նախկին բորտուղեկցորդուհի Կարինե Խալաթյանի միջնորդությամբ Սարգիս Հակոբյանը կենսաթոշակառուներ՝ Արմեն Հակոբյանի, Միխայիլ Եֆրեմյանի, Աշոտ Թունյանի, Տիգրան Սիմոնյանի, Սեյրան Հովհաննիսյանի և Ծիրուն Ասատրյանի օգտին ակնհայտ ապօրինի գործողություններ կատարելու դիմաց նույն բաժնի գլխավոր մասնագետ Գրետա Վարդանյանի օժանդակությամբ նրանցից ստացել է զգալի չափերով կաշառք, պաշտոնական փաստաթուղթ հանդիսացող կենսաթոշակի գործերում և հաշվարկ-կարգադրություններում մտցրել է ակնհայտ կեղծ տեղեկություններ, իր գործողություններով օժանդակել է կենսաթոշակառուների կողմից տարբեր ժամանակահատվածներում կենսաթոշակի գումարները ստանալուն և հափշտակելուն, իր ծառայության նկատմամբ անբարեխիղճ և անփույթ վերաբերմունք դրսևորելով' անզգուշությամբ էական վնաս է պատճառել պետության օրինական շահերին:

Ժորա Ղուկասյանը և Ալինա Գևորգյանը Գրետա Վարդանյանի դրդմամբ, նախնական համաձայնության գալով, պատրաստել և իրացրել են իրավունք վերապահող և պաշտոնական փաստաթուղթ հանդիսացող փաստացի բնակվելու վերաբերյալ կեղծ տեղեկանքներ: