Ոստիկանությունը միջոցառումներ է ձեռնարկում ԱԺ պետհամարանիշների վերադարձման ուղղությամբ

Ինչպես տեղեկացրել ենք, ԱԺ նախորդ՝ 4-րդ գումարման որոշ պատգամավորներ, չնայած ԱԺ ղեկավարության թախանձագին խնդրանքներին, չեն ցանկանում ետ վերադարձնել ԱԺ-ից իրենց ամրակցված պետհամարանիշները, որոնց օգտագործման ժամկետը ավարտվել է մայիսի 31-ին՝ ԱԺ 5-րդ գումարման առաջին նստաշրջանի օրը։ Մեր տեղեկություններով, ԱԺ ղեկավարությունը ստիպված դիմել է ՀՀ ոստիկանություն՝ վերոնշյալ պետհամարանիշների հետախուզություն հայտարարելու խնդրանքով:

Այս առթիվ կապ հաստատեցինք ոստիկանության լրատվության բաժնի հետ, որտեղից հաստատեցին մեր ունեցած տեղեկությունը։ Փաստորեն, ԱԺ–ի աշխատակազմից գրությամբ ոստիկանություն են դիմել ԱԺ նախորդ՝ 4-րդ գումարման պատգամավորների տրանսպորտային միջոցների համարանիշների գտնման վերաբերյալ։ Այս պահին ճանապարհային ոստիկանությունը միջոցառումներ է ձեռնարկում տվյալ պետհամարանիշների վերադարձման համար։ Ավելին, ներկայումս Աժ աշխատակազմը հինգերորդ գումարման պատգամավորների հայտերի հիման վրա պայմանագրեր է կնքում վերջիններիս տրանսպորտային միջոցների հաշվառման, համապատասխան համարանիշների տրամադրման վերաբերյալ։

Նույն հարցի առթիվ կապ հաստատեցինք նաև ԱԺ գործերի կառավարիչ Հմայակ Մկրտչյանի հետ, ով նշեց, որ, իսկապես, պայմանագրերի ժամկետն արդեն լրացել է և ուժի մեջ չեն ո՛չ պայմանագրերը, ո՛չ տեխանձնագրերը։ «Տարել հանձնել ենք ՊԱՏ, ՊԱՏ-ն էլ հավաքում է պետհամարանիշները, մենք ՊԱՏ-ի հետ կապի մեջ ենք»,– ասաց Հմայակ Մկրտչյանը։

«Ոչ մի լուրջ խոչընդոտ չի առաջացել, մարդ կա, ասենք, երկու ամսով գնացել է հանգստանալու և կգա կհանձնի, ոչ մի պատգամավոր էլ ոչ մի պրոբլեմ չի առաջացնի։ Զուտ տեխնիկական պրոցես է, գործընթացի մեջ է, ֆիզիկապես չեն հասցրել»,– ամփոփեց Հմայակ Մկրտչյանը։

Ինչքան էլ զարմանալի է՝ Աժ կառավարիչը չգիտեր, թե ովքեր են այդ պատգամավորները։

Նելլի Ավետիսյան