ՄԱԿ-ի Մարդու իրավունքների հանձնաժողովը Հայաստանի վերաբերյալ եզրակացություն է ընդունել

ՄԱԿ-ի մարդու իրավունքների հանձնաժողովը Հայաստանի երկրորդ և երրորդ պարբերական զեկույցների վրա հիմնվելով` հուլիսի 25-ին ընդունել է Հայաստանի վերաբերյալ եզրակացություն, որում մասնավորապես մտահոգություններ են արտահայտվում մարդու իրավունքների խախտման դեպերի վերաբերյալ և առաջարկվում է կատարել օրենսդրական որոշակի փոփոխություններ։

Հանձնաժողովը մտահոգություն է հայտնել իրավապաշտպանների և լրագրողների նկատմամբ հնչող սպառնալիքների և կատարվող հարձակումների վերաբերյալ, անդրադարձ է կատարել սեռական փոքրամասնությունների խնդիրներին։

Հանձնաժողովը անդրադարձել է նաև Մարտի 1-ի դեպքերին, նշելով որ 2008թվականի մարտի 1-ին արտակարգ դրություն հայտարարելու պայմանները պարզ չեն և որ մինչ օրս իշխանությունները այս հարցի վերաբերյալ հիմնավոր պատասխան չեն ներկայացրել։ Այս մասին այսօր լրագրողների հետ հանդիպմանը նշել է Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը։

«Պետությունը պետք է ապահովեր, որ արտակարգ դրության վերաբերյալ օրենսդրությունն ու կարգավորումները լիովին համապատասխանեին դաշնագրի 4-րդ հոդվածին: Խոսքը վերաբերում է ոչ միայն 2008 թվականի Մարտի 1-ի արտակարգ դրության հրամանագրին, այլ նաև Արտակարգ դրության մասին օրենքին, որն ընդունվել է: Հանձնաժողովը գտնում է, որ Մարտի 1-ի իրադարձությունների համակողմանի և ամբողջական քննություն չի իրականացվել»,- ասաց Սաքունցը:

Հանձնաժողովը նաև անհանգստացած է ՀՀ զինված ուժերում ոչ մարտական պայմաններում կասկածելի մահերի և զինծառայողների նկատմամբ վատ վերաբերմունքի առնչությամբ։ Մտահոգություն է հայտնել նաև կալանավայրերում գերբնակեցման առթիվ, ինչպես նաև դատական իշխանության անկախ չլինելու կապացությամբ: Կալանավայրերի վերաբերյալ հանձնաժողովը արձանագրել է, որ չկան անկախ բողոքարկման մեխանիզմներ, և վատ վերաբերմունքի դեպքերի ուղղությամբ պատշաճ քննություն չի իրականացվում

Ըստ պարբերական զեկույցի` Հայաստանը չի ապահովում նաև քաղաքացիական այլընտանքային ծառայություն իրականացումը, չի պայքարում պետական մարմիններում կոռուպցիայի տարածվածության դեմ:

Հանձնաժողովի կողմից նաև անհանգստություն է հայտնվում ոստիկանների գործունեության մասին: Նշվում է, որ չնայած 2010-2011 թվականների բարեփոխումներին` արձանագրվում է, որ, այնուամենայնիվ, ոստիկանական ուժերը պետք է արդյունավետ վերապատրաստում անցնեն, նրանց գործողությունների հաշվետվության մեխանիզմները պետք է գործեն: