Մեծ տարբերություն եմ տեսնում թավշյա հեղափոխությունից առաջ և հետո ԱՄՆ կատարած այցերի միջև․ Մարուքյան

ՀՀ Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը մեծ տարբերություն է տեսնում Հայաստանում տեղի ունեցած թավշյա հեղափոխությունից առաջ և հետո ԱԺ հայ-ամերիկյան բարեկամական խմբերի՝ ԱՄՆ կատարած այցերի միջև:

Այս մասին Մարուքյանն ասաց նոյեմբերի 25-ին տեղի ունեցած մամուլի ասուլիսի ընթացքում:

«Շատ հաջողված էր այցը, որովհետև ես մասնակցել եմ նաև 2018 թ. փետրվարի այցին՝ մինչև հեղափոխությունը, տարբերությունը շատ մեծ էր, որովհետև հայկական կողմը հստակ ասելիք ուներ ԱՄՆ-ի հետ հարաբերությունների զարգացման առումով և Հայաստանում կատարված փոփոխությունների առումով»,- ասաց Մարուքյանը:

Հայաստանի օրենսդիրներն Ամերիկայի Միացյալ Նահանգներում մի շարք հանդիպումներ են ունեցել տարբեր ձևաչափերով:

«Իմ քայլը» խմբակցության ղեկավար Լիլիթ Մակունցը նշեց, որ այցի նպատակներից մեկը Ամերիկայի իրենց գործընկերների հետ ուղիղ կապ հաստատելն էր:

«Քանի որ առաջին այցն էր, շատ կարևորում էինք ուղիղ կերպով կապ հաստատելը Սենատի և Ներկայացուցիչների պալատի մեր գործընկերների հետ: Հանդիպումների ձևաչափը եղել է ոչ միայն կոնգրեսականների ֆորմատով, այլև ներառել է առանձին փորձագետների հետ հանդիպումներ: Հիմնական շեշտադրումը, որ արել ենք, այն էր, թե ինչպես ենք պատրաստվում ինստիտուցիոնալ մակարդակի վրա բարձրացնել մեր հարաբերություններն ու համագործակցությունը»,- ասաց Մակունցը:

«Իմ քայլը» խմբակցության պատգամավոր Տաթևիկ Հայրապետյանն ընդգծեց, որ հանդիպումների ընթացքում Հայաստանում ԱՄՆ նախկին դեսպաններ Ջոն Հեֆերնն ու Ջոն Էվանսը նշել են Միացյալ Նահանգներում Հայաստանի իմիջի նկատմամբ փոփոխության և Հայաստանի դերակատարության ու նշանակության բարձրացման մասին: