Կորոնավիրուսից մահացած մարալիկցի տղամարդու կինն ու դստեր ընտանիքը մեկուսացած են

Գիշերը կորոնավիրուսից մահացած 68-ամյա տղամարդը Մարալիկի բնակիչ էր: Այս մասին ԼՈՒՐԵՐ.com-ին հայտնեց Անի խոշորացված համայնքի ղեկավար Արտակ Գևորգյանը:

Նա նշեց՝ մահացած տղամարդը ուղեկցող հիվանդություններ է ունեցել. «Տղամարդը որսի սիրահար էր, այլ անձանց հետ շատ շփում չուներ, չգիտենք, թե ումից է վարակվել: Նրա հետ քիչ թվով անձինք են շփվել, բոլորն էլ այս պահին մեկուսացված են: Ապրում էր կնոջ հետ, որդին արտերկրում է, աղջիկն էլ Երևանում է ամուսնացած: Կինն ու աղջկա ընտանիքը մեկուսացված են»,- նշեց նա:

Համայնքապետի խոսքով՝ Մարալիկում այլ դեպքեր չեն հայտնաբերվել, բազմաբնակարան շենքերի մուտքերն էլ ամեն օր ախտահանվում են:

Նշենք, որ այս քաղաքացու հետ շփված 29 բուժաշխատողներ են այս պահին մեկուսացված Գյումրիում:

Հիշեցնենք, որ Հայաստանում արդեն 8 քաղաքացի է մահացել կորոնավիրուսից: