Այդ ոստիկաններն ու զինծառայողները պետք է մինչև վերջին կոպեկը վերադարձնեն. Նիկոլ Փաշինյան

Ի՞նչ է լինելու ԱԻՆ-ում, ՊՆ-ում, ոստիկանությունում աշխատող այն անձանց հետ, որոնք դիմել են աջակցության 9-րդ ծրագրի համար ու գումար ստացել, բայց հիմա գրություններ են ստանում առ այն, որ այդ գումարները պետք է հետ վերադարձվեն, կառավարություն-ԱԺ հարցուպատասխանի ժամանակ վարչապետից հետաքրքրվեց ԼՀԿ պատգամավոր Կարեն Սիմոնյանը։

«Այդ գումարները պետք է վերադարձվեն, որովհետև դրանք նախատեսված էին բոլորովին այլ կատեգորիայի մարդկանց համար։ Այն, որ ծառայությունների որոշ տեսակներ կան, որոնք գաղտնի են և արձանագրված չեն ընդհանուր բազաներում, սողանցք է դարձել ու ցավալի փաստ է, որ սոցիալական անապահով խավի համար նախատեսված միջոցները գնացել են այլ ուղղությամբ։ Գումարները պիտի վերադարձվեն, ավելին՝ ծառայողական քննություն պիտի իրականացվի պարզվելու համար, թե ինչպես է դա ստացվել», - պատասխանեց Փաշինյանը։

Նա շեշտեց. «Շատ ցավալի փաստ է, որ անապահով խավի համար նախատեսված միջոցները գնացել են ոչ նրանց համար նախատեսված ուղղությամբ: Ավելին՝ ծառայողական քննություններ պետք է իրականացվեն, թե ինչպես է դա տեղի ունեցել: Դա շատ վատ երեւույթ է, որ ճգնաժամի պայմաններում նման տրամաբանությամբ ենք առաջնորդվում: Մեկը բանկում ավանդ ունի, բայց աջակցության ծրագրից գումար է ստանում: Սա է խնդիրը: Մինչեւ վերջին կոպեկը պետք է վերադարձնել»: