«Իմ քայլը»-ի անունից ցավում եմ, որ խմբակցությունը տրվել է սադրանքների․ Մակունց

ՀՀ ազգային ժողովի «Իմ քայլը» խմբակցության ղեկավար Լիլիթ Մակունցը կարծում է, որ նիստերի դահլիճում տեղի ունեցած միջադեպը «Լուսավոր Հայաստան»-ի կողմից արված սադրանքի արդյունք է, կարծում է, որ այդ սադրանքները սկսվել են Ապօրինի գույքի բռնագանձման մասին օրենքի ընդունումից հետո: Մակունցը նման տեսակետ հայտնեց ընդմիջումից հետո վերսկսված նիստում: 

«Նախ ուզում եմ «Իմ քայլը» խմբակցության անունից ներողություն խնդրել ՀՀ քաղաքացիներից և բոլոր այն հայրենակիցներից, որոնք ականատես են եղել միջադեպին: «Իմ քայլը» խմբակցության անունից ցավում եմ, որ խմբակցությունը տրվել է սադրանքների, և տեղի է ունեցել այն, ինչ տեղի է ունեցել»,-ասաց Մակունցը:

Նրա կարծիքով՝ արդեն շաբաթներ շարունակ «Լուսավոր Հայաստան»-ը փորձում է սադրել և ներքաշել «Իմ քայլը» խմբակցությանն այնպիսի գործողությունների մեջ, որոնք տեսախցիկների առջև կներկայացնեն «Իմ քայլը» խմբակցությանը հենց այն տեսանկյունից, ինչպիսին Մակունցի գնահատմամբ, ուզում էր, սադրում էր և փորձում էր տեսնել Մարուքյանը:

Նա շեշտեց՝ որևէ կերպ չի փորձում արդարացնել միջադեպը և նորից վերահաստատում է, որ ցավում է կատարվածի համար: «Միևնույն ժամանակ ուզում եմ արձանագրենք, որ «Լուսավոր Հայաստան» խմբակցությունը ԱԺ է բերում ոչ թե «Լուսավոր Հայաստան» խմբակցության օրակարգը, այլ անհասկանալի, ԱԺ-ից դուրս գտնվող խուլիգանական խմբակների օրակարգը»,-կարծիք հայտնեց Մակունցը: