Նիկոլի իշխանությունը նշանակում է Հայաստանի թուլացում, Հայաստանի թուլացումը նշանակում է պատերազմ. Վազգեն Մանուկյան

Նիկոլ Փաշինյանը 2,5 տարվա ընթացքում չի օգտագործել ինքնորոշում բառը, հայտարարել է, որ Ղարաբաղը Հայաստանի տարածք է։ Դա նշանակում է, որ վեճը ազգերի ինքնորոշման սկզբունքից տեղափոխվում է տարածքայինի: Այս մասին մի շարք լրատվամիջոցների հետ հարցազրույցի ժամանակ ասել է «Հայրենիքի փրկության» շարժման վարչապետի թեկնածու Վազգեն Մանուկյանը։

Նրա խոսքով՝ վարչապետի այդ հայտարարությունից ստացվում է, որ «Հայաստանը տարածք է ուզում վերցնել Ադրբեջանից», վերջինս էլ պաշտպանում է իր տարածքը:

«Այդ տեսակետից իր համար ավելի նպաստավոր եղավ սկսել պատերազմ և շատ ագրեսիվ չհամարվել։ Նաև՝ Տավուշի դեպքերի ուռճացումը բերեց մի և՛ անձնական, և՛ ազգային վիրավորվածությանը ոչ միայն Ադրբեջանի, այլև Թուրքիայի, իսկ վերջինս հիմա դարձել է երևի աշխարհի ամենաագրեսիվ պետությունը, և եթե Թուրքիայի հորդորները չլինեին, Ադրբեջանը պատերազմ չէր սկսի։ Ադրբեջանի ներքին գնահատականն այն էր, որ 2,5 տարում Հայաստանը և իր բանակը թուլացել է, և արդեն կարելի է հարձակվել: Նիկոլի իշխանությունը նշանակում է Հայաստանի թուլացում, Հայաստանի թուլացումը նշանակում է պատերազմ»,- ասել է նա։

Ըստ Մանուկյանի՝ մենք այժմ Թուրքիայի հետ նորմալ հարաբերություններ կարող ենք ունենալ միայն մի պայմանով՝ եթե կռանանք, ասենք՝ «մենք ձեր վասալն ենք»։

«Այս տարածաշրջանում գլխավոր խաղացողները Թուրքիան և Ռուսաստանն են։ Եթե մենք Թուրքիայի հետ կապենք մեր ապագան, դատապարտված ենք ոչնչացման։ Մեզ համար հիմա Ռուսաստանի դերը շատ ավելի բարձր է, քան երբևիցե եղել է։ Դա չի նշանակում, որ դու չպետք է հարաբերություններ ունենաս ուրիշ երկրների հետ։ Ես կարծում եմ, որ մենք ստրատեգիական, ռազմական տեսակետից պետք է կապված լինենք նաև այն երկրների հետ, որոնք Թուրքիայի դեմ ինչ-որ իմաստով ոչ ֆորմալ ալյանս են կազմել։ Հիմա մեր անվտանգության գլխավոր երաշխիքը ՌԴ խաղաղապահ զորքերն են, և ֆորմալ տեսակետից դա վերանալու է 5 տարի հետո»,- նշել է Վազգեն Մանուկյանը։