Ճանապարհների ապաշրջակափումը մեզ ձեռնտու է. Մարիա Կարապետյան

«Շատ կարևոր է ընդգծել, որ ոչ թե Հայաստանն է շրջափակել Ադրբեջանին և Թուրքիային, այլ հակառակը` Ադրբեջանը և Թուրքիան են շրջափակման ենթարկել Հայաստանը՝ Լեռնային Ղարաբաղի հակամարտության համատեքստում Հայաստանին և Արցախին թուլացնելու և մեզ զիջումներ պարտադրելու համար»: Այս մասին այսօր՝ օգոստոսի 11-ին, ԱԺ ամբիոնից ասաց իմքայլական պատգամավոր Մարիա Կարապետյանը:

«Սրանից, իհարկե, կարելի է եզրակացնել, որ ապաշրջափակումը մեզ ձեռնտու է: Սա չի նշանակում, որ տարածաշրջանում տնտեսական և տրանսպորտային կապերի ապաշրջափակումը ձեռնտու չէ Ադրբեջանին: Ադրբեջանը, իհարկե, ցանկանում է դեպի Նախիջևան ճանապարհ և երկաթգիծ ունենալ, բայց Ադրբեջանի նախագահ Իլհամ Ալիևը, միևնույն ժամանակ, նախընտրում է տորպեդահարել այս օրակարգը և նոյեմբերի 9-ի ու հունվարի 11-ի հայտարարություններով իր ստանձնած պարտավորությունները չկատարել»,-ասաց Կարապետյանը՝ հավելելով, որ այդ պատճառով է, որ Ալիևը աղավաղում է ապաշրջափակման օրակարգը՝ ներկայացնելով այն որպես «միջանցք»:

Իսկ ի՞նչ է տալիս «միջանցքի» մասին Ալիևի հեքիաթը.

«Այն մի կողմից փորձ է հայ հանրությանն ահաբեկելու, որպեսզի հետ կանգնի տարածաշրջանի ապաշրջափակման մտքից, մյուս կողմից՝ դա փորձ է մոլորության մեջ գցելու ադրբեջանական հանրությանը, ինչ-որ կերպ բացատրելու, թե այդ ինչու է Արցախը վիրավոր, բայց կանգուն»,- նշեց Կարապետյանը

 «Պետք է ֆիքսենք՝ տարածաշրջանային ապաշրջափակման օրակարգը շատ ու շատ փխրուն է: Այն, հարկե, մեր օրակարգն է, սակայն բացառապես նոյեմբերի 9-ի և հունվարի 11-ի հայտարարություններով ստանձնած համաձայնությունների շրջանակներում: Այս համատեքստում անհրաժեշտ է, որ հայաստանյան խորհրդարանական և արտախորհրդարանական ընդդիմությունը համախմբվի այս օրակարգի ճշգրիտ ձևակերպման շուրջ»,- եզրափակեց Կարապետյանը: