Հերթական ստվերային գործարքը. ի՞նչ որոշում են կայացրել իշխանությունները

Վերջին շրջանում Հայաստանի իշխանությունները ակտիվորեն հող են նախապատրաստում՝ Ամուլսարի հանքի շահագործումը վերսկսելու համար: Դիցուք՝ «Լիդիան Արմենիան» տեղեկացնում է, որ ս.թ. հուլիսի 29-ին ՀՀ վերաքննիչ վարչական դատարանը մերժել է ՀՀ բնապահպանության և ընդերքի տեսչական մարմնի կողմից ներկայացված վերաքննիչ բողոքը: Հիշեցնենք, որ ՀՀ Վարչական դատարանը 26.02.2020թ. անվավեր էր ճանաչել Ամուլսարում ստուգումների արդյունքում 2018թ. օգոստոսի 24-ին ՀՀ բնապահպանության և ընդերքի տեսչական մարմնի կողմից կայացված թիվ 30 ակտը` դրանում արձանագրված թվով 10 խախտումներից 8-ի, այդ թվում նաև Ամուլսարի տարածքում ապօրինի հանքարդյունահանման վերաբերյալ կետի մասով: Դատարանը նաև անվավեր էր ճանաչել Տեսչական մարմնի նախկին ղեկավար Արթուր Գրիգորյանի՝ «Լիդիան Արմենիայի» վարչական բողոքը մերժելու մասին թիվ 30/1 որոշումը: Վարչական դատարանը գտել էր, որ նախքան իր նշանակումը որպես Տեսչական մարմնի ղեկավար Արթուր Գրիգորյանը ակտիվորեն ներգրավված էր եղել Ամուլսարի ծրագրի դեմ գործողություններում, ինչը ողջամիտ կասկածներ էր առաջացնում «Լիդիան Արմենիայի» վարչական բողոքը մերժելու պահին նրա` որպես համապատասխան իրավասու մարմնի պաշտոնատար անձի անաչառության վերաբերյալ:  Դժվար է պատկերացնել, որ դատական համակարգը առանց վերևների «դաբռոյի» նման որոշում կարող է կայացնել, պարզապես՝ այսպիսով փորձ է արվում մաքրել Լիդիանին, մեղքը բարդելով տեսչական մարմնի նախկին ղեկավարի վրա:

Էկոնոմիկայի նախարար Վահան Քերոբյանը իր հերթին բացահայտ հայտարարում է, որ Ամուլսարի հանքը կարող է դառնալ հանրապետության թիվ մեկ հարկատուն:

ԱՄՆ դեսպան Լին Թրեյսին թեև դիվանագիտորեն զուսպ է արտահայտվում վերը նշված հարցի մասին, այնուամենայնիվ անգամ դիվանագիտական լեզվով պարզ են դեսպանի մեսիջները՝ ՀՀ իշխանություններին: Մասնավորապես, Լին Թրեյսիի այն հայտարարությունը, որ Լիդիանի խնդրի կարգավորումը վստահություն կներշնչի միջազգային ներդրողներին: Սա փաստացի նշանակում է, որ մինչ Ամուլսարի շահագործումը ներդրումներ ակնկալել պետք չէ:

Այսպիսով՝ ՀՀ իշխանությունները սկսել են ակտիվորեն հող նախապատրաստել Ամուլսարի հանքի շահագործման համար՝ փորձելով սիրահաշել ԱՄՆ-ին և ներգրավել արևմտյան կապիտալը, իսկ փող իշխանություններին, անշուշտ, պետք է: Որպես հանքի բացման թիվ մեկ հիմնավորում էլ կբերվի Սոթքի հանքի շուրջ ստեղծված իրավիճակը, ի դեպ, ուշագրավ է, որ թշնամին վերջին օրերին ուղղակիորեն թիրախավորում է հանքը, խափանելով վերջինիս աշխատանքը և դրանով իսկ հեշտացնելով ՀՀ իշխանությունների գործը: Այլ հարց է՝ թիրախը պատահական է ընտրված, թե սա էլ ինչ-ինչ պայմանավորվածությունների մաս է կազմում...